【果欄中的江湖大嫂】岑麗香馮盈盈騷Body照出街 禁色令玩完？
有人睇《果欄中的江湖大嫂》係想睇果欄裡面嘅人情味，亦有人係為咗睇黃浩然、楊明等大隻仔，不過以上原因嘅人加起嚟都永遠唔及呢類人多，而呢類人就係純粹為咗睇陳煒、岑麗香同埋馮盈盈等呢班索女。你嫌平時見到佢哋行行企企吹水、搬貨嘅畫面唔夠養眼？OK，無所不能嘅TVB一定滿足到你嘅需求，就喺第12集臨尾嗰五分鐘，呢套劇好似轉哂Tone咁。如果淨係睇到呢一幕，你可能真係以為TVB又翻播14年前以沙排做主題嘅《赤沙印記@四葉草.2》。
喺呢五分鐘，浩然、香香、楊明仲有盈盈四個人就去到沙灘度打排球，點知兩個男仔就喺半放水半認真嘅情況下被兩個女仔屈機，當中楊明更瘋狂畀盈盈嘅排球省中。不過，呢啲都唔係重點，重點係香香同盈盈兩個著住運動Bra Top嘅女仔喺呢五分鐘裡面不停烏低個身晒出事業線，搞到一班男觀眾睇到眼都唔眨，但係問題就嚟喇，說好的限奶令呢？
之前TVB播《波士早晨》時，限奶令就執行得好嚴謹，特別係著住比堅尼嘅林泳淘喺泳池出水芙蓉嘅一幕，佢嘅豐滿上圍就硬生生咁畀人Blur咗，但幾秒之前觀眾喺電視機前又睇得好清楚喎，搞到件事就好離奇。唔通《果欄中的江湖大嫂》播出時禁色令已經放寬咗，可以畀一班女星騷下Quali？真係百思不得其解。
唔知盈盈嘅解釋會唔會畀到一個圓滿嘅答案畀大家？佢回覆《香港01》時就咁講嘅：「拍嘅時候就未有保護女藝人呢個聲明嘅，同埋拍嗰陣其實都係符合返成件事，係著Sport Bra Top、背心去打波，所以係好有青春活力嘅感覺。至於點解唔Blur？一來係運動場面，個個都郁郁下，要做後期Blur都幾難；二來呢個原因都好緊要，我講我咋，唔係講香香，係我冇乜性感嘅Feel出咗嚟，望住我打沙排都唔會有遐想啦，又唔係特別洶湧，使鬼Blur咩，Blur嚟都嘥心機！認真返先，其實係因為件事唔色情，好青春，唔著背心打波仲怪啦！」
係咪即係唔夠洶湧、唔夠睇頭就唔使Blur？盈盈就咁答嘅：「唔係關大細事，係講出嚟個效果同感覺嘅，如果個效果係比較太誘惑、太性感，又同主劇情冇咩必然關係，為咗顧及所有家庭觀眾嘅觀感，咁就有可能出現調整，但以我哋打沙排嗰場做例子，個感覺都係青春活力做運動，而且呢幕同故事有關，就係話我哋通過打沙排，令到我哋嘅感情都增進唔少，所以就唔可以剪走呢個畫面，亦因為唔係坦胸露臂，所以都有保留嘅空間。」
《果欄中的江湖大嫂》第12集最後五分鐘嘅精彩截圖：
當日嘅拍攝都有安排傳媒探班：