【明報專訊】荃灣前區議員岑敖暉（Lester）因民主派「35+初選案」正在還押，噚日（11日）喺獄中度過30歲生日，數數手指已經係佢於獄中度過嘅第三個生日，其太太噚日喺Lester嘅專頁上收集對Lester嘅祝福，希望丈夫可以早日回家與家人團聚，生日可以一齊切蛋糕，仲話𠵱家對佢哋嚟講好遙遠，「希望很快一天變回現實」。
妻盼大家集氣祝福
岑太話，Lester成日苦笑話自己喺獄中「由27歲坐到30歲」，而岑太噚日亦提及自己就快30歲，兩人養嘅狗「肥波」明年就7歲。佢話希望大家可以集氣祝福，等Lester同埋其他朋友快啲出獄，同家人、朋友團聚，聖誕節可以一齊佈置聖誕樹，情人節可以親手送花畀屋企人，母親節、父親節都可以同父母同枱食飯。
陳劍琴歡迎踏三字頭
唔少人都有留言送上祝福，包括社民連前主席吳文遠、荃灣前區議員陳劍琴、藝人王宗堯等，其中陳劍琴留言歡迎Lester踏入三字頭，仲話想約食飯𠻹。