女兒，是爸爸的前世情人、今世的小公主；阿Sa蔡卓妍，是粉絲、影迷們的唯一，在Sa爸（蔡就勝、Wilson）的眼中，她既是前世情人、小公主，也是他的唯一。
「阿Sa由出世到o依家，我都未打過佢、未鬧過佢。佢十一歲幾嘅時候，我同我嘅ex-wife離婚，之後十年，都係我一個人帶佢嘅，我哋好似朋友咁。」
Sa爸只有阿Sa一粒女，所以即使要父兼母職，他也樂在其中，試過因擔心女兒，偷偷到女兒學校「查崗」。歲月如梭，現在女兒事業、愛情雙豐收，倒過來為仍孑然一身的爸爸擔心。
「Twins係一個奇蹟嚟，一出就爆，所以佢有好多機會、好多經驗，o依家佢反而擔心我多啲，佢話：『你要快啲搵番個伴嘞！再係咁，就我係你個伴o架嘞！』」
看Sa爸談女兒時的慈愛笑容，大概已說明，父女間的牽絆，在世間有多獨一無二。

一身潮流品牌出品的Sa爸，怎看也不像六十七歲，但他仍笑稱，要保密年齡。

內疚

廿年以來，阿Sa對其家庭生活也相當公開，因此大眾對Sa爸、Sa媽，都有一定認知，亦知道二人已離婚多年。對於未能給予女兒一個健全的家庭，Sa爸也有點無奈。
「咁我都冇辦法o架，（離婚）唔係我提出嘅。但當時我嘅唯一條件，就係阿Sa一定要跟我，咁佢媽咪又OK。Up till now，我同阿Sa都冇傾過呢個問題（離婚），呢啲係兩個大人嘅事，都冇必要同個細路仔講。
「阿Sa性格同我差唔多，比較Easy going（隨和）、樂觀、唔會斤斤計較；但佢做嘢比較Tough（硬朗），係似佢媽咪嘅。」
愈是樂觀，Sa爸便愈認為女兒對父母離異無感，直至數年前，他從阿Sa的訪問明白，這個「不能說的話題」，曾經傷了女兒的心。
「我睇到一個轉載嘅訪問，佢話當年爹哋媽咪離婚，佢有時半夜起身，會望住牀頭櫃張相喊。嗰張相係佢好細嘅時候，我同佢媽咪，同佢去咗溫哥華博覽會影嘅。
「我睇咗個訪問，有少少Touching，亦覺得有少少內疚同虧欠咗佢，有啲後悔當時冇同佢傾吓，而佢亦都冇問我⋯⋯」
女兒令Sa爸感動的，不止舊事，「以前我做嘢忙，好多時都係我阿媽，照顧阿Sa嘅起居飲食。我同我媽住得好近，所以阿Sa放學冇飯食，嫲嫲會拎飯俾佢；有時佢夜晚十一點幾肚餓，嫲嫲又會馬上煮嘢俾佢食。
「早兩年，阿Sa請晒成個家族去台中旅行，一團成廿幾人，佢話一定要同嫲嫲同房，仲全程照顧嫲嫲。嗰時我媽都九十一歲，佢話阿Sa晚晚瞓覺之前，都會幫佢全身按摩，等嫲嫲舒服啲，我聽到好開心！」

六年級起便跟着Sa爸生活，於父親工作繁重時，阿Sa的起居飲食，也由現年九十三歲的嫲嫲照顧。一九年她請家族到台中旅行，每晚也為嫲嫲作全身按摩，以盡孝道。

Sa爸欣慰地表示，不用再擔心阿Sa，「佢呢家識人多過我、叻過我，同埋諗嘢都叻過我！」