絲絲講場:港人家居唔識保 - 東方日報

    絲絲講場:港人家居唔識保

    香港人屋企面積雖然出名細,但原來港人平均擺成40萬蚊嘅貴重財物喺屋企!

    呢個平均數係AXA安盛調查咗約千名港人所得。雖然咁多貴重財物放屋企,但AXA安盛首席財產保險營銷總監蔡香君就話,即使近六成人知火險同家居保險有分別,但當中九成人唔知差異喺邊!

    兩者有乜分別火險主要涵蓋樓宇結構,好似牆壁、天花及地台等。至於家居保險保障範圍就較廣,例如家中易碎物件爛咗、又或因意外而導致受保居所損毀要另覓臨時住處嘅費用、甚至家中寵物咬親訪客,都可以有得賠。

    調查發現,有33%受訪者過去一年真係遇過家居意外,但就近八成人冇買家居保險!至於點解冇買?四成人話冇諗過有需要,36%話屋企冇貴重嘢,31%覺得家居財物蒙受損失嘅風險低喎。你有冇份咁講呢可?

    余絲韻