鄭中基4月戶外騷開賣 首個設私家車睇騷位演唱會 拍片解答11個疑問：只限私家車、唔可以帶寵物…

鄭中基於生日前夕突然宣布4月24、 25在中環海濱活動空間，舉行一連兩場的戶外演唱會，並會安排車輛入場睇騷的位置，座位票分為$1,080及$880兩種，車輛套票則為$ 6,000，鄭中基公布開騷後，樂迷既期待同時對香港首個自駕騷有很多疑問。

Q1.演唱會係咪只限車輛進入？

鄭中基：唔係﹗今次嘅戶外演唱會有座位同車位兩種，冇車嘅朋友都可以嚟﹗

Q2.入場車輛有甚麼限制？

鄭中基：只限私家車，電單車、校車、貨車都係唔得嘅﹗高度限制係1.65米，因為要確保唔會阻檔到後面嘅車輛同觀眾。

Q3.開騷時車輛要熄匙嗎？

鄭中基：停泊咗之後必需要熄匙，熄埋車頭燈，唔可以響安。

Q4.車輛內有無限制人數？

鄭中基：私家車內只可以坐四個人。

Q5.車輛進場後可否中途離開再次進場？在場內可以自由行駛嗎？

鄭中基：唔可以嘅﹗唔可以中途出去再入番嚟﹗

Q6.買了車輛套票，人可否在場內任何範圍觀看？

鄭中基：每個車位有專屬4米x6米空間，在自己車位範圍內睇，現場有安排流動廁所。

Q7.車輛套票點樣入場？

鄭中基：入口處有指示，唔可以座位區入，現場分人及車的入口。

Q8.車輛套票會如何編排位置，是否先到先得？

鄭中基：唔係，每一個套票有編號，要按編號停泊指定位置，車位同車位有足夠活動空間。

Q9.開篷車可以進場嗎？

鄭中基：可以﹗

Q10.能否帶寵物？

鄭中基：除了導盲犬之外，禁止帶任何寵物進場。

Q11.入場有乜規則要遵守？

鄭中基：要遵守政府公布之最新防疫措施，進場會進行體溫測試，填寫個資料表格或安心出行，每個進場人士必需戴口罩，以及現場沒有賣食物。