到底讀書有冇用？　讀書就等如學歷？

呢單野其實係好耐之前嘅事嘅事，最近又在YouTube吵到沸沸揚揚，不過我見喺Facebook無乜人提，無他，因為兩位（有一說係三位，不過今日我主要就講住兩位先）仁兄都係YouTuber，主要地盤就係YouTube，Facebook又係第二個地盤，所以不如我又係呢邊引發下大家討論，而我都希望抽時間拍一條YouTube講返我對呢個題目嘅睇法。

首先我希望大家有少少背景資料睇睇先，因為可能兩位當事人大家未必識。其實事前我都未聽過兩者，唔係兩位唔出名，只係bob叔主要講煮嘢食，我比較少睇。而慕容公子雖然係打機，但係玩嘅都唔係我感興趣嘅範圍，喺YouTube呢個跟興趣派資訊嘅玩法入面，兩位都入唔到我個list咁解。講知名度，應該兩位（bob叔有48萬訂，而慕容公子都有13萬）都係窮生之上，呢點要戴一戴頭盔。講返件事，事源「慕容公子」係直播打機果陣回應網友，講到佢認為讀書無用，讀書多唔等於搵到錢，並講自己有啲朋友援交、倫敦金月入十數萬。相反好多大學生出黎社會做野都係萬幾蚊一個月，感覺讀書多嘅人只係「自high」，學歷根本無用，不如早啲出黎做YouTuber搵錢仲好。

無知令人很尷尬

「慕容公子」多番提到香港係資本主義社會，就係講錢。錢係最容易量化，所以用搵錢能力嚟量化一個人嘅個人價值就最科學。我點解要講咁多「慕容公子」？就係因為佢講左好多令我覺我好尷尬嘅野，其中之一佢仲要教大家炒牛熊證過活，所以我點都要同大家講下，有時我睇到一啲人講嘅說話，真係尷尬到令我唔敢再睇落去，我決定用一段嚟解毒一下。

首先，資本主義社會的確高舉金錢嘅價值，不過資本主義嘅核心價值其實係自由市場，我地重視金錢嘅價值，係因為以金錢作為媒介去交易，係最容易量化，最有效減低交易成本（Transaction Costs）嘅方法。即係話，錢係重要嘅工具，但係錢永遠唔係目的，個人價值可能需要用錢實踐，你要拍一部電戲你需要錢，你發明一樣技術需要錢，但係就唔會變左你個人嘅價值就係錢，我唔奢望「慕容公子」明白，我係希望睇佢嘅觀眾明白。

讀書等如學歷？

之後，有人用「讀書＝學歷？」來為慕容公子開脫。我想講，兩者係無衝突，而且都有其重要性。首先，知識有幾重要就係人都知，成功可能未必需要有學歷，但係無知識，必難長期維持成功。而讀大學除咗係讀書本上面嘅硬知識，更重要係開闊眼界，學習如何學習。未接受過大專教育嘅人可能不明白，大專教育着重溝通同探索。教學唔再係中小學嗰陣咁，老師講你聽。你需要面對好多老師都未必了解嘅知識，你會透過同同學一齊討論／切磋，係過程中得到進步同經驗。

此外，其實知識係無處不在，就以慕容公子做嘅YouTuber為例，做YouTuber要有內容，講嘢言之有物，呢啲嘢係邊度黎？就要讀書囉！做YouTuber要剪片加特效，有聲有畫一腳踢，呢啲嘢點解會識？就要讀書囉！好多小朋友見到個「哥哥姐姐」做YouTuber搵到錢，覺得搵錢好似好容易，當中就出現我哋經常所講嘅倖存者偏差（survivorship bias），內容農場經常會以「聰明人多數會ＸＸＸ」為題，例如聰明人大多都比較懶，很多人就以為自己懶是因為自己是天才，但佢地唔知道自己更有可能是一個又懶又蠢嘅傻人而已。因為呢種不負責任嘅KOL講幾句，放棄左原本努力緊嘅野嚟發夢，就係Opportunity Cost嘅問題。我不歧視慕容公子中學中途綴學，打機也的確有機會係佢一條出路，的確好多人中途絕對都好叻，都好有成就的。不過不求甚解，誤人子弟就有必要譴責一下，呢個係我作為成年人嘅責任，我相信Bob叔都係出於呢個原因而出聲。

【延伸閱讀】做YouTuber好好搵？大J爆YouTuber月入5萬不是夢

而學歷嘅作用，其實正正就係資本主義嘅產物，就係同錢一樣，有減低交易成本（Transaction Costs）嘅作用。大公司請人，一百人去見，公司點會有咁多時間個個人深入了解一下？於是，學歷就係門檻，代表你喺某個知識範疇嘅知識同技術有一定標準。公司會先將無學歷嘅人screen out，再在有學歷嘅人入面搵出有能力嘅人。如果慕容公子有認真讀過佢咁重視嘅資本主義，佢就會讀到「資訊不對稱」（information asymmetric）和「 搜尋成本」（search cost）。當然，呢啲知識我都唔係學校度學，我係中學課餘時間看書學的。可見一個人有求知慾，唔係單純睇錢係幾咁重要，開口埋口問人搵到幾錢，真係無禮貌得嚟，又有失身份。

推薦影片反映個人品味

承上段講到Opportunity Cost的問題，在資料只會多不會少嘅年代，對眼同腦袋時時刻刻都被「內容」，又因為而家上網，社交媒體只會讓你看到你喜歡嘅東西，所以萬一你惹上了垃圾內容，你會發現你的YouTube推薦影片只會不停出現垃圾影片。所以，我一向好喜歡留意下唔同人個YouTube推薦會彈啲乜野片出嚟，真係比任何方法更能反映出一個人嘅品味。為了長大之後做個有品味，有營養嘅人，從小要學嘅未必一定係硬知識，而係分辨資訊品質嘅能力，唔好因為人地講兩句「嘩眾取寵」嘅說話，揮霍了自己可貴的青春，多年後回首「不想記起，難以忘記」。人生總會有一兩件糗事唔想畀人知，不過花左時間心機係垃圾內容入面，就唔抵嘛！最後，知道公子有炒牛熊，我希望佢識得分什麼是收回價，什麼是行使價，什麼是槓桿比率吧！

【文章來源：窮家有道；獲作者授權轉載。原題：兩代Youtuber隔空對罵！到底讀書有冇用？】

【關於作者】

窮一生，80後多媒體設計師、《窮家有道》網站主理人及《戒窮》作家。22歲由3萬元總資產、12K月薪起步，26歲儲到人生第一個100萬，30歲再翻數倍，座右銘是「學會掌握理財技能，使我可以『窮一生』的追逐興趣」。