東條英機

東條英機
日本內閣總理大臣
任期 1941年10月18號－1944年7月22號
前任	近衛文麿
繼任	小磯國昭
第21任日本參謀總長
任期 1944年2月21號－1944年7月18號
前任	杉山元
繼任	梅津美治郎
第52任日本陸軍大臣
任期 1940年7月22號－1944年7月22號
前任	畑俊六
繼任	杉山元
第1任日本軍需大臣
任期 1943年11月1號－1944年7月22號
前任	首任
繼任	藤原銀次郎
個人資料
出世	1884年7月30號（戶藉上面係12月30號） 大日本帝國東京府東京市麹町區（即依家東京都千代田區）
死	1948年12月23號(1948-12-23)（64歲） 日本東京都豐島區巢鴨監獄
墓地	雜司谷靈園 殉國七士廟
政黨	大政翼贊會（1940年–1945年）
配偶	東條勝子
親戚	東條壽（細佬） 東條由布子（孫） 東條英利（太孫）
仔女	東條英隆 東條輝雄 東條敏夫 杉山光枝 東條滿喜枝 鷹森幸枝 君枝·吉爾伯遜
父母	東條英教（老豆）
母校	陸軍士官學校 陸軍大學校
宗教信仰	佛教
獎	從二位 勳一等旭日大綬章 功二級金鵄勳章 瑞寶章
簽名
軍事背景
效忠	大日本帝國
服役	大日本帝國陸軍
服役時間	1905年–1945年
軍銜	陸軍大將
指揮	關東軍 （1932年–1934年） 憲兵隊 （1935年–1937年） 駐蒙軍 （1937年8月–1937年9月）
參戰	俄國內戰 入侵滿洲 二二六事件 第二次中日戰爭 平綏鐵路沿線作戰 太平洋戰爭

東條英機（日文：とうじょう ひでき，日文新字體：東条 英機，1884年7月30號—1948年12月23號）係日本軍國主義嘅代表人物，陸軍大將。東京府出世，喺二戰時期出任第四十任首相（任期1941年10月18號－1944年7月22號），任內協助發動珍珠港事件，同埋爆發太平洋戰爭。打完仗畀遠東國際軍事法庭判為甲級戰犯，處以絞刑。

依家啲人多數將佢視為日本二戰最大代表人。雖然發動二戰嘅人係上任嘅近衛文麿，唔少戰略亦早響佢上任之前計劃好，但由於東條比上任更加狂、更加好戰，令到軍國主義響日本好快蔓延，搞到日本走上不歸路；佢嘅行事作風響日本國內外都好有爭議。

生平

細個

1884年7月30號，陸軍中將東條英教嘅第三個仔響東京府東京市麹町區（即依家嘅東京都千代田區）出世，改名叫「英機」。由於大佬英夫同埋二哥英實都先後因為鉛而死咗，所以英機實際上係大仔，同時之間都孭住全家人嘅希望。

英機出身響安房東條氏，係安房國一個好出名嘅地主世家，而祖先係嚟自盛岡藩，響江戶時代曾經做過寶生流嘅能樂師。

佢先後入讀番町小學、四谷小學、學習院初等科、青山小學、東京府城北尋常中學校（即依家嘅都立戶山高等學校），之後轉校到東京陸軍地方幼年學校。

軍人時代

當時仲係軍人嘅東條

響東京陸軍地方幼年學校畢業之後，升讀陸軍中央幼年學校同埋陸軍士官學校。畢業後加入近衛步兵第三連隊，1907年升做步兵中尉。期間仲試過挑戰考陸軍大學校，但最後失敗。最終佢響1912年成功入讀。

1915年響陸軍大學校畢業，同年升做第三連隊中隊長。1918年，佢曾經短暫逗留響西伯利亞。1919年，一個人去瑞士做咗日本駐瑞士駐外武官，1921年改去駐守德國。同年10月27號，東條由柏林趕去參加巴登巴登密約。響回程嘅路上，佢搭嘅火車路經美國，呢次係佢一生人唯一一次去過美國。佢對美國嘅印象係：「美國人係物質主義者，同時又好懶散，淨係識得享受、賺錢同玩，追求一啲好似性、飲酒同開party嘅嘢。」

1922年出任陸軍大學校教官，一年後兼任參謀本部員同埋陸軍步兵學校研究部員。

1924年，美國國會通過《移民管制法》，其中寫明話限制亞洲人入美國，好多議員話呢個法例係必需，因為亞洲人勤力過美國人，嚟太多亞洲人對美國唔好。呢點大大刺激咗東條。佢苦澀咁講：「呢條法例顯示出佢哋骨子裏白人至上嘅思想。佢哋永遠都會睇低亞洲人，日本都唔例外。」佢得出一個結論：「既然係噉，日本就要更加強大，先至可以生存喺呢個世界上！」

1926年升做陸大兵學教官，1928年升做陸軍步兵大佐，同時就任陸軍省整備局動員課長，一年後調任步兵第一連隊隊長。同時佢係一夕會嘅核心人物，響1928年出任陸軍省動員課長之後，仲有份編寫滿洲問題解決方策大綱。

1933年升職至陸軍少將，同年先後調任兵器本廠附軍事調査委員長同埋陸軍省軍事調査部長。一年後升職做步兵第二十四旅團長。

關東軍同第一次入閣

當時係航空本部長嘅東條

1935年9月21號，東條升任關東軍憲兵司令同埋關東軍警務長。在任期間，佢拉咗好多支持第三國際嘅關東軍軍人，話係要防止關東軍畀人「赤化」。1936年二二六事件之後，屬於「統制派」嘅東條，要求拉咗響關東軍內部、有份參加二二六事件嘅軍官，目的係要打壓軍內皇道派軍官。呢次行動徹底打擊咗皇道派嘅士氣，而東條就因為有「出色」嘅表現而升咗做陸軍中將。

1937年，佢升任關東軍參謀長。響第二次中日戰爭爆發嗰陣，佢畀人任命做察哈爾派遣兵團團長，主導平綏鐵路沿線作戰（即察哈爾作戰）；響兩個月之內，先後攻下張家口、南口、集寧同大同。由於佢打得好到令上頭睇起佢，所以東條就自把自為噉幫察哈爾派遣兵團改花名叫「東條兵團」。

1938年，近衛文麿組成第一次近衛內閣，任命東條英機由陸軍航空本部長升做陸軍次官，呢次係東條第一次入閣。同年11月28號，響軍人會館（即依家嘅九段會館）搞陸軍管理事業主懇談會，佢響會上提出：「要快啲徹底解決支那事變（第二次中日戰爭嘅日文名），支持擴大對支那（中國）嘅戰爭。對於一直幫緊中國嘅英、美、蘇三國，我建議都打埋佢哋，噉就可以徹底搞掂呢次事變。我已經準備好開戰，北方打蘇聯，南方打英美。」

響呢番說話播出街之後，有唔少陸軍軍人反對（即「主和派」），主張唔好搞大場仗，其中最大影響力嘅係石原莞爾。近衛文麿響佢地嘅反對下唔知要點落決定。東條響平綏鐵路沿線作戰入面嘅成功，堅定咗高層開戰嘅諗法；主和派就因為冇人支持，而畀人降職，或者申請調走。

無耐，時任首相近衛文麿就宣佈開戰，希望可以徹底解決事變，同支持法西斯主義。東條冇耐之後都話支持，係日本史上第二個支持法西斯嘅人。

政治時代

荻外莊會談。其中最右手面嘅係東條

1940年，東條因為同近衛意見差唔多而畀人升職，做咗陸軍大臣。任內佢曾經幫近衛形成三大軸心國。

響近衛嘅第三次內閣生涯入面，日本同美國關係唔好，因此近衛要成日搵陸軍大臣嘅東條傾對美國嘅事。但係後嚟，隨住近衛開始同美方和談，兩個人嘅分歧就越嚟越大。有一次，近衛向東條提議：「不如由駐兵問題上面解決日美問題，可能會有好好嘅效果。（暗示係想撤兵）」東條一聽，即刻就發嗮火：「撤乜嘢兵！駐兵可以話係我哋嘅心臟，我哋係咪要一退再退，連自己個心都要讓埋？如果你真係噉做，就等於喺外交上投降。」呢次對話為第日近衛辭職埋下咗伏筆，亦睇得出東條主戰嘅決心。

響1941年8月嘅一次研究會上，研究人員指出響日美戰爭入面「日本必敗」，但東條冇理到呢個忠告。

近衛響同年曾經搞荻外莊會談，但最後會談上偏向支持「主戰派」嘅東條決定同美國開戰；再加上近衛同美國談判失敗，因而決定唔撈。佢曾經響辭職信上提到：「東條英機係一個對戰爭充滿信心嘅軍人。既然佢都判斷係時侯同美國開戰，而我又勸唔掂佢，我已經冇得再履行我嘅責任。」

本身近衛係提名咗主張同美國和平談判（即係「主和」）嘅東久邇宮稔彥王做下任首相，唔少陸軍高層覺得稔彥王圓滑嘅手段有利於佢哋去管軍隊，所以都唔反對佢。但係內大臣木戶幸一覺得相比起稔彥王，東條英機更加夠「強硬」，所以最後就改為提名佢。陸軍高層知道咗之後覺得好驚訝。

首相時代

東條內閣

響得到昭和天皇嘅同意後，東條響1941年10月18號正式做第四十任首相。昭和天皇響佢上任前，曾經要求佢要盡量避免同美國開戰（但最後都係爆發太平洋戰爭）。出於天皇嘅命令，東條被迫搵性格溫和嘅東郷茂德做外務大臣，處理好同外國嘅關係。

由於天皇要求唔可以打仗，呢個要求對於一直好戰嘅東條嚟講簡直係一題好難做嘅數。雖然佢一直奉行住天皇命令，違背住自己嘅諗法（其實東條想打美國好耐），去同美國談判。

外務大臣東鄉曾經提出Plan A同Plan B，東條胸有成竹噉交畀美國，以為美國一定會接受，但係美國唔騷佢。東條好嬲，決定唔再同美國談判，直接開戰。

太平洋戰爭同二戰後期

東條英機宣佈開戰

1941年12月8號，佢發表宣言，宣佈同英美開戰。同一日，經過東條批准同埋響山本五十六嘅帶領下，日軍成功偷襲珍珠港，對美軍造成打擊。響同英美開戰四日後，東條宣佈將抗日戰爭合併到英美開戰，統稱「大東亞戰爭」（即係中文嘅太平洋戰爭）。

響成功偷襲珍珠港之後，日軍士氣好高，希望可以「速戰速勝」，但係日軍響太平洋戰區、澳洲戰區同中途島海戰都全部打輸，唔少士兵因為噉而死咗，令到日軍懷疑係咪真係可以打嬴仗。

紀念太平洋戰爭爆發一周年

中途島海戰入面，山本五十六嘅死令到參謀本部諗出南方作戰計劃，但係內部依然有唔少反對聲音。為咗唔畀內亂影響大局，參謀決定以海軍為中心，響瓜達卡納島派駐好多海軍士兵；另一方面，陸軍曾經三次提出「登島計劃」，以突襲去搶返個島，但係參謀本部一啲都唔接受。後嚟，海軍先後同聯合國軍打咗好多場海仗，雖然打沉咗英美兩國唔少軍艦；但同時好多陸軍輸送船（即係運送糧食嘅船）唔係畀人打沉就係未到之前就已經爆炸，搞到響島上一直打仗嘅海軍唔夠嘢食同埋子彈。參謀本部要首相東條英機落命令，將好多私人艦（平民百姓嘅船）都加入做輸送艦，但係東條唔肯噉樣做。

對於東條嘅反應，參謀本部一下子就好嬲，第二日就搵嚟陸軍軍務局長佐藤賢了同東條嚟傾。但係佐藤都唔肯讓步，結果兩方人就響度鬧交。參謀本部作戰部長田中新一鬧東條係「馬鹿野郎」，東條就賴佢當初淨係著重海軍，完全唔理陸軍，有今時今日完全係參謀本部自己攞嚟衰。最後因為陸軍唔肯聽話，搞到要放棄個島。

因為成日打輸仗，日軍嘅優勢正響度動搖。東條為咗保持優勢同個面，決定接納外相重光葵嘅議案，響1943年11月於東京開大東亞會議。

終戰後

自殺失敗

内文：東條英機自殺未遂事件

東條自殺唔成

1945年8月15號，日本正式宣佈投降，二戰完咗；9月2號美國派軍艦駐守日本，並且組成駐日盟軍，開始對東條呢班支持發動二戰嘅軍人展開審判。東條亦都估到自己遲早會有畀人拉嘅一日，曾經考慮過將除咗大仔英隆同二仔輝雄之外，其他都過繼做人哋嘅契仔契女；又或者畀老婆返娘家。但係佢為咗面子，最後揀咗自殺。9月11號，響即將畀人拉嘅時候，東條英機用曲特M1903袖珍擊錘內置式半自動手槍對住自己心口開咗一槍，意圖自殺。

趕住嚟拉東條嘅駐日盟軍聽到槍聲之後，嗱嗱臨叫咗白車，響東條屋企做急救。由於子彈嘅位置離個心好近，所以佢一度有生命危險。駐日盟軍總司令麥克阿瑟知道之後，為咗唔畀東條就咁死咗，就請咗軍醫約翰遜上尉嚟醫東條，仲送埋佢去橫濱本牧嘅野外醫院，用上最好嘅治療。當東條醫返好之後，雖然周街都有所報道，但嚟睇佢嘅人得好少，所以佢好唔開心。由於東條係軍國主義嘅忠實兼代表人物，加埋今次事件，啲人個個話佢怕死，令佢嘅名聲一落千丈。

但係時任陸軍人事局長額田坦就有另一個講法：「響11號當日，有好多MP響未事先通知下入咗東條大將嘅屋企，大將透過隻窗見到佢哋，意識到佢哋係要嚟拉自己嘅，所以就急急忙忙咁想去換件衫。點知MP以為佢係要走佬，所以就開槍，擊中咗佢嘅心口。MP阿頭知道自己瀨嘢，就call咗白車。」目前主流都依然相信東條英機係意圖自殺，而唔係由MP開槍。

今次自殺事件有好多疑點，第一：東條係左優，但今次佢專登用右手開槍；第二：佢用嚟自殺嗰把槍，係二女婿古賀秀正（當時已經自殺）嘅遺物，用一個由死人留低嘅嘢，明顯唔尋常；第三：如果東條真係想一了百了，佢應該對住自己個頭開槍，而唔係對住心口。根據以上嘅理由，有人懷疑佢今次只係「做show」。

東京裁判判決

喺度受緊審嘅東條（1947年影）

1946年4月29號，遠東國際軍事法庭正式對東條等28名罪犯起訴。東條嘅代表律師係清瀨一郎。一向出名好勝嘅佢，今次居然唔自辯。

評價

戰爭方面

有外國畫家畫咗模擬當時東條自殺唔成嘅情景，對自殺唔成嘅東條有恥笑嘅意味

全世界嘅人對東條自殺唔成普遍持恥笑嘅態度。有好多平民百姓知道後，就鬧佢：「點解佢唔學阿南惟幾噉用刀自殺，偏要走去用槍？」

政策

内文：東條內閣

其他

藝術

内文：關於東條英機嘅藝術作品

屋企

東條英機兩公婆同孫女由布子影嘅相，由左手邊開始係勝子、由布子、英機

老豆：東條英教

阿媽：東條千歲

老婆：東條勝子（原本姓伊藤，係英機嘅遠房親屬）

兄弟姐妹：大佬英夫---二哥英實---細佬壽

• 大仔：東條英隆
  • 孫女：東條由布子（結咗婚後，戶籍名改叫岩浪淑枝）
  • 孫仔：東條英勝
    • 太孫：東條英利
• 二仔：東條輝雄
• 三仔：東條敏夫
• 大女：光枝（嫁畀杉山茂）
• 二女：滿喜枝（先嫁畀古賀秀正，響古賀自殺後改嫁田村健二）
• 三女：幸枝（嫁咗畀鷹森立一）
• 細女：君枝（嫁咗畀外國一個生意人）

其實東條英機一共有十四個孫仔女（計埋外孫），但除咗大仔英隆嘅後人之外，其他根本唔夠膽公佈個名出嚟，驚畀人鬧（英機畀人睇成二戰最大罪人，如果公佈出嚟有可能影響自己聲譽），有啲孫仔仲唔夠膽跟族譜名「英」字輩嚟改。

屋企人嘅資料同關係

• 東條英機同大仔英隆嘅關係極差。英隆本身有弱視，所以當唔到兵。正因為噉，英機寧舍睇唔起呢個仔，唔提攜佢，搞到英隆身為首相大仔，但就要走去做鴨綠江發電職員呢種低級工。之後英隆做滿洲國差人，英機知道後，就要求一係炒咗佢，一係就唔畀佢升職，但最後冇人理英機。響二戰就嚟完嗰陣，因為英隆係大仔，為咗唔俾人仇視，佢帶埋一家大細搬去伊東住。英機畀人拉咗之後，響巢鴨監獄打電話畀大仔，希望英隆可以過嚟探下佢，點知英隆同佢講咗一句：「你仲有咩嘢值得我留戀。」（暗示唔會過嚟探佢），冷靜嘅語氣令周圍嘅人好驚訝。
• 雖然英機同英隆嘅關係好差，但佢同大孫女由布子（英隆大女）嘅關係反而就幾好。由布子細嗰個陣，曾經因為出面幫阿爺講好說話，而畀老師鬧。大個女之後，佢唔單止支持阿爺，仲唔認遠東國際軍事法庭、靖國神社分祀、慰安婦同埋南京大屠殺。雖然佢係有心想為阿爺平反，但由於佢係嫁咗人，俗稱「嫁出去嘅女就等於潑出去嘅水」，所以東條家一啲都唔鍾意由布子嘅一舉一動，話佢多事同埋唔守家訓。
• 二仔輝雄響二戰後做咗一位飛機設計師，之後仲做咗三菱重工副社長、三菱汽車社長同會長。但佢從來都冇評論過老竇任何嘢。
• 三仔敏夫係英機三個仔入面，唯一一個繼承老竇飯碗，走去當兵嘅人。響二戰後，佢轉到航空自衛隊當兵，最後升到空將補（即係少將）。