名人：愛！劉詩昆孫穎無視36載鴻溝

如果說音樂可以打破語言地域的界限，那麼愛就是無所不能。

現年77歲的「國寶級鋼琴大師」劉詩昆與41歲的「鋼琴公主」孫穎始於音樂，忠於人品，無視36載年齡鴻溝，共歷14年風雨，兩人的感情早已昇華至靈魂伴侶，沒有白紙黑字的誓詞，也會照顧對方一輩子，陪伴就是最長情的告白。

性格互補

劉詩昆與孫穎結緣於2002年的一個周年晚宴上，孫穎在席間表演琵琶及鋼琴，孫爸爸對劉詩昆很是崇拜，在宴會上一直想找機會跟對方合照，怎料劉詩昆主動通過中間人找孫穎，因為他對這個能精通中西樂器的女生甚是好奇，成就了這段忘年交！談到對劉詩昆的第一個印象，孫穎笑言﹕「好多人覺得佢好威嚴，但我見到佢嘅笑容，覺得佢好純真。」音樂才華令兩人愈走愈近，而人格魅力令他們走得長久，劉詩昆大讚孫穎：「佢係性情中人，好直、好真，佢對我唔係為名為利，以前追佢嘅男人，比我有錢嘅大有人在，佢係喜歡我嘅人格同藝術氣質，佢懂得我嘅價值。」孫穎自問有精神潔癖，認為只從外表及物質去找尋另一半，關係並不持久﹕「就算喺大家眼中係一個條件好好嘅男人，如果佢對某個好有身份嘅人卑躬屈膝，只係一個畫面，我已經對佢冇晒感覺，我眼中係容唔到一粒沙。如果冇精神上嘅交流，只靠外表同物質，最多係三五年，幸慶我好早就知道，從來唔會隨波俗流，我好忠於自己，我哋呢種靈魂伴侶係好珍貴，喺精神上係離開唔到對方。我哋識咗十幾年，依然可以煲五個鐘電話粥，又可以一人攞一本書各自睇，大家唔講嘢都冇問題。我同佢嘅性格係一凹一凸，佢比較柔，我好剛強，大家性格互補。」

百分百信任

之前劉詩昆與前妻蓋燕鬧離婚，一直守護在他身邊不離不棄的孫穎被冠以第三者之名，對此，孫穎也只是一笑置之﹕「話知佢，每日都會畀唔同人標籤好多嘢。」並以「配得起最好，承受得起最差」的心態去面對，她說：「我可以從老師（劉詩昆）身上得到好珍惜嘅力量，令你無所懼怕，你鍾意話第四第五者都好，我好清晰自己做緊乜，事實上最了解我哋嘅只有我哋兩個。」當時孫穎曾經出錢出力為劉詩昆度難關，孫穎認為兩人不存在「幫」這個字眼﹕「因為我哋係不分你我，佢唔係有經濟困難，只係當時啲錢被凍結咗，我就同我屋企人講，你哋有幾多流動資金，全部拎晒出嚟，當時係感覺到大家一條心，嗰種力量係好大。」劉詩昆坦言兩人在經濟上是完全透明，甚至連劉詩昆的兒子與胞妹對孫穎也是絕對信任﹕「我冇0.1%去防對方，我大仔會將錢放喺孫穎戶口，唔係幾十萬，而係好多錢，又或者我個妹有筆錢，見放喺銀行冇利息，就會叫孫穎用佢嘅錢去投資，大家就係憑一個信字，連字據都冇寫。」

有諗過生兒育女

當愛情已昇華到某一層次，結婚對劉詩昆與孫穎來說，反而失去了意義，孫穎揚言：「結婚唔係咁重要，就算要結婚都唔係為咗維繫我哋嘅感情，可能係為咗公司要上巿，感性嗰部分唔需要靠結婚，我哋就算唔結婚，都會照顧對方一生一世，冇一紙婚書反而更享受。」至於生兒育女，孫穎也有想過，但並非非要不可，她說﹕「我哋好鍾意小朋友，但養兒防老呢個觀念已經過時，冇都唔會覺遺憾，心態係一半一半。」

每個人對幸福的定義各有不同，孫穎認為幸福是每朝起床，會很怕失去對方，會想假如沒有對方，還可以跟誰傾訴，而孫穎身邊正好有一個劉詩昆。她笑言自己早在16歲的日記上，已經寫下最欣賞的男性要有180CM以上身高，還要懂得彈拉赫曼尼諾夫的樂曲，後來她才發現在世上乎合這兩個條件的只有劉詩昆一人，你說怎能不惜珍他。