Viu TV主辦嘅選秀節目《Good Night Show 全民造星》由99位參賽者中，通過唱歌跳舞等一系列嘅才藝比賽選出一位終極偶像，簡直係名副其實嘅百里挑一。節目播出以嚟爭議同話題不斷。有話參賽者質素唔高，騎呢選手多，又有網民批評節目舞台，燈光同音樂都非常簡陋，但瑕不掩瑜，隨住比賽白熱化，節目都喺批評聲中慢慢成長。選手或多或少都收穫咗唔少人氣同fans。但係人紅是非多，最近同選手有關嘅花邊新聞都一單單咁爆嗮出嚟。睇到人O嗮嘴。
登入 瀏覽本網站，可獲取積分換領專屬優惠
點擊查看專屬優惠
早前節目已經通過比賽選出十強選手，分別係1號Stanley、11號龍志權、20号Jeremy、23號Anson Kong、32號Ian、34號Lokman、40號細貓、45號肥仔、63號Edan、99號姜濤。99號姜濤無疑係人氣最高嘅選手，佢無論係外型定係唱功，跳舞都相當唔錯，實力喺一眾選手之中算優秀。
姜濤最吸引fans當然都係佢嘅小鮮肉屬性，1999年出世，19歲卜卜脆，仲自爆曾經係肥仔，因為想追女仔所以減肥，但減肥成功之後內心依然保留肥仔嘅嗰種自卑感，成日擔心自己做得唔夠好，處男，未拍過拖等等，萌點非常多......
姜濤以前個肥仔look同宜家嘅小鮮肉靚仔形象實在係相差太遠，以前個鼻矮矮，塌鼻子同宜家嘅高鼻樑點睇都唔似淨係減肥成果，同埋鼻哥窿都好似細咗咁，即刻就有傳聞話原來姜濤唔單只減肥，仲整過容。
姜濤宜家鼻樑超挺，而且五官精緻，喺全民造星十強中係顏值數一數二嘅選手。仲有個朵叫“嫩版彭于晏”。
有網民挖出姜濤17歲拍微電影時嘅劇照，見佢眼腫腫，而且好明顯係單眼皮，同宜家嘅雙眼皮花美男形象都有唔少差距，估姜濤應該係隆鼻+割雙眼皮。
一波未平一波又起，整容風波都未嚟得切澄清，又有人揾出一張姜濤同女仔手拖手嘅相，此相一出，一班fans仲嬲過知道姜濤整容！個個都大鬧姜濤講大話，扮處男！
相中姜濤同個女仔手拖手，笑眯眯，關係一定唔簡單。
有緋聞肯定要全部澄清先得喇。因為全民造星嚟緊10月先會舉行總決賽，所以十強選手早前就跟住監製花姐遠赴美國練舞，姜濤都因為忙緊苦練舞功所以就未有就呢啲傳聞回應。
姜濤同一班選手喺美國學足10日跳舞真心好攰，所以佢都未有時間回應傳聞咁話。
好啦，終於等一班仔仔學成返港，花姐梗係要帶住佢地上電台接受訪問，又順便俾姜濤解釋一下咁多是是非非。
一班選手同花姐上節目。
姜濤就話自己絕對冇整過容，係純天然原裝出品，仲即場變豬鼻驗證冇整容。
至於拖手相，姜濤就語出驚人，力保處男之身，佢話“我都想拍拖！不過我自作多情”，原來嗰日姜濤同個女仔係俾朋友起哄，拖手影咗張相，但係拖完手就冇嗮下文。不過姜濤話對個女仔確實有好感，不過對方就唔騷佢，佢都只能食檸檬。真心陰功豬。
不過相信姜濤宜家想拍拖應該話咁易喇！
十位參賽者之前大拿拿去到美國練舞，返到嚟大家肯定都唔只關心姜濤啲緋聞，梗係都好想知佢哋嘅美國之旅順唔順利，但係毒舌花姐一啲面都唔俾，狠批龍志權同Ian跳舞太差！連美國嘅導師都搖頭！
大家都知道Ian一向係花姐心頭好，行唱得路線，唱歌仲有名師指點，所以跳舞方面弱少少都可以理解。睇嚟比較危險嘅應該係龍志權。
不過仲有兩個禮拜先到總決賽，宜家邊個係最後贏家都未有定數，從人氣角度嚟講，目前姜濤嘅位置依然難以撼動，就睇其他選手各處奇招，爭取勝利嘅寶座嘞。