前日出活動暈倒 姜濤IG報平安︰我沒事～

前日出席品牌活動時身體不適而暈倒嘅MIRROR成員姜濤，休息一日過後喺社交平台上出post報平安，仲感謝大家嘅關心。

姜濤首先向fans道歉，又寫道「身為藝人，沒有照顧好自己的身體是自己的責任。所以好好聽了花姐的話，今天好好吃飯睡覺了。休息一天後身體狀況好很多了」。佢又感謝每一個關心自己嘅人，仲話「你們都是我生命中的貴人」。

隊友Edan都有留言打氣，唔少fans都叫一樣忙於拍劇錄音同出活動嘅Edan小心身體。

另外姜濤又喺限時動態post出舉起v字手勢照片，並寫上「我沒事～」。

前日姜濤同MIRROR隊友Anson Lo（盧瀚霆）、Edan（呂爵安）及Jer（柳應廷）喺尖沙咀出席時裝品牌活動，點知喺接受傳媒拍照期間，姜濤突然腳軟倒下，事後需要由工作人員攙扶離開。

事後經理人花姐喺IG 交代姜濤情況「今早有少許胃痛 現場環境有點焗 加上閃光燈不斷 所以有少許腳軟而跣低 現在休息中 沒有大礙」。而正在拍攝姜濤主演新片嘅導演彭秀慧，表示會跳拍其他戲份，俾時間姜B休息。

按此下載 Yahoo APP 9月免費送一萬個蛋撻王Q嘜蛋撻，仲有貓山王榴蓮冰皮月餅/鳳梨奶黃月餅同你賀中秋，立即下載！