田總10公里跑 黃尹雋姚潔貞奪男女總冠軍

跑步有益身心，近年都成為唔少香港人嘅嗜好。黛安知道，田總主辦嘅「新鴻基地產香港10公里挑戰賽2019」噚日就喺天水圍開跑，今屆除咗有新鴻基地產冠名贊助，仲有星辰錶、屈臣氏蒸餾水、活力司國際有限公司及Libratone聯合贊助，陣容頂盛，自然吸引咗唔少精英長跑運動員參賽。

噚日喺好天氣「助攻」下，唔少選手都跑出超水準成績，包括出名跑得嘅姚潔貞，以34分10秒奪得「女子壯年組冠軍」同「女子全場總冠軍」兩大佳績；男子組就由黃尹雋發揮後勁，以30分51秒奪得「男子壯年組冠軍」同「男子全場總冠軍」。計番大賽本身限時1個半鐘頭，即係兩位冠軍都只係用咗三分一時間就完成賽事，黛安都覺得佢哋好勁啊！