驄賀珠年
農曆新年將至,香港人過年,首選節目梗係一家大細入戲院,睇番齣賀歲片開心吓。今年賀歲片百花齊放,由鬼才林敏驄首次執導嘅《如珠如寶》,就集合老中青三代演員,糅合經典、瘋狂同溫情,令觀眾有一個暖心嘅新年。
今次「Paco巨星飯堂」,我就請嚟阿驄,率領另一位「阿聰」:男主角張繼聰同莊端兒(Xenia),去到位於銅鑼灣嘅「佳牛美酒」,歎住出色嘅日式燒肉,暢談電影幕後嘅趣事。
賀歲片《如珠如寶》係阿驄(左)首次執導作品,除咗佢粉墨登場,Xenia同張繼聰(中及右),仲有一眾老中青實力演員擔綱,係過年其中一個好節目。
首次執導
《如珠如寶》於一月底上映,首執導演筒嘅阿驄,搵嚟《老表你好嘢》中搞笑鐵膽張繼聰、王菀之、阿Bob,加埋上一代嘅好戲之人洪金寶、吳耀漢、泰迪羅賓及恬妞等,一睇卡士就知,笑料一定有保證。
阿驄表示拍呢部處男導演作,係經過精心挑選,搵嚟唔同年代嘅演員合作。「大哥(洪金寶)同Uncle Richard(吳耀漢)係八十年代『五福星』系列嘅鐵膽,Teddy、恬妞姐都係代表人物,加埋呢一代嘅演員,我希望一家人嚟到睇嘅時候,都會有其他家庭成員啱睇,睇完又再睇。」
男主角阿聰就話:「雖然一齊做演員嘅時候,我同導演都合作過,但係今次嘅感覺係完全唔同。唔好俾佢浪子嘅外表呃咗,其實佢心思好細密,我一睇佢寫嘅劇本,就feel到佢想帶出嘅message。
「部戲叫《如珠如寶》,係想講我哋年輕一輩,對待老人家要如珠如寶。到埋位拍嘅時候,好多時我同阿Bob都會改少少劇本,導演又好open,同我哋一齊創作,仲會作出適當嘅潤飾,所以拍攝過程都充滿歡樂。」
我帶三位嘉賓,去到位於銅鑼灣嘅「佳牛美酒」,歎住出色嘅日式燒肉,暢談電影幕後嘅趣事。
戲中阿聰同阿Bob,為收回老人院地皮而潛入「敵方」基地做看護,引發一連串笑話。
從電影海報,就知電影喜氣洋洋,夠晒合家歡。
澳洲純種M9+和牛西冷($520/100g、300g起),油份充足。
稀有部位盛合($428),包括一件牛翼板、一件牛三角、一件牛板腱及兩件牛肩胛肉,全為日本A5和牛,各有特色。
笑中感性
導演就坦言:「做導演有好多福利,鍾意做乜就做乜,可以為所欲為,飾演一個上帝嘅角色,無中生有。其實做導演有呢度好,叫佢食屎就食屎,叫佢跳海就跳海,跳十次唔夠,再跳廿次,唔夠三十次都仲要跳⋯⋯講緊係阿Bob其中一場戲。有阿聰喺度好,我唔使親手打阿Bob,可以叫張繼聰打佢,一樣咁痛。」
被武器化嘅阿聰,就話最難得係同好戲嘅前輩合作。「好似Uncle Richard咁,今次我同佢有啲認真嘅情節,拍嘅時候佢入晒戲,好快就老淚縱橫,我就跟住佢啲戲,唔好走失就OK。」
感性之外,性感嘅演出就有Xenia負責。「有一場戲導演要我着住件冇吊帶嘅泳衣,仲要吩咐服裝姐姐改細咗成個碼,逼爆咁滯!跟住又要我喺浴缸度係咁跳,當時好多人圍住一齊睇,我跳咗成百幾次。之後仲要我浸喺浴缸度,前後浸咗成四個半鐘,浸到皺晒皮。」
阿驄首次執導,被阿聰大讚夠Open,賦予演員集體創作嘅空間,令我更希望觀賞佢嘅「BB」。
洪金寶大哥喺戲中,重現1985年上映嘅《龍的心》造型,喚起集體回憶。而另一好戲之人泰迪羅賓﹙下圖﹚,舉手投足都盡顯功架。
女將仲有恬妞同王菀之,演技同喜感都有保證。
澳洲厚切牛舌($188),入口感覺豐富。
燒日本北寄貝($198),要燒得保留原汁原味,甚考工夫。
撻爐撻Q
講戲,三位講到七情上面,講食佢哋一樣興起,Xenia話:「我最鍾意食日本嘢,件件都細細件,感覺冇咁易肥。平時我就食好多菜,而我亦好鍾意食菜,可能因為咁先可以keep到。」
阿聰表示:「幾年前我就食齋嘅,但後來因為要練肌肉就停咗,o依家就因為下個角色嘅關係,要食多啲練大隻啲。喺屋企有媽咪又有老婆,廚房係佢哋嘅領土,我就比較少煮嘢食。
「加上搬咗屋之後,我連廚房個爐都唔識撻,話說有一晚,成屋嘅人瞓晒,我忽然間想食個麵,點知新嗰個爐我完全唔識撻,撻到成個廚房都係煤氣味,個爐都唔着。最後我只係用熱水,焗腍個麵就咁食。」
Xenia為藝術犧牲,浸喺浴缸數小時都無怨言,阿聰話:「我欣賞佢喺咁凍嘅環境之下,浸到皺晒皮都繼續演戲,真係好有heart。」
阿聰同吳耀漢嘅一段「父子情」,係導演向父親致敬嘅情節。
日本和牛配溫泉蛋飯($158),燒肉配上一口飯及溫泉蛋,消弭油膩感又加添味覺層次。
燒新鮮大磨菇($68),啱晒用嚟refresh吓。
佳牛美酒
地址:銅鑼灣渣甸街66號亨環7樓
電話:28864838、52209066