「大榮華」都去過好多次,飲茶晚飯都試過,而家得返元朗總店,今日同屋企人嚟飲早茶,都差唔多滿座,十一點前大、中、小點一律當小點計$27,咁就梗係叫大點啦。
✣沙律海鮮卷
點心紙上無,係侍應用托盤捧住推銷,好耐無食過,新鮮炸起,威化紙沾上麵包糠嘅外皮炸得脆而軟,咬開熱辣辣,芒果酸甜,蝦肉爽口,撈埋沙律醬好夾。而家飲茶好少見,通常係舊時去飲會食到。
✣韮菜豬紅 (大點)
醬汁濃郁惹味,豬紅口感幾滑好入味,韮菜有啲老。
✣香煎蝦米腸 (大點)
碟細細但都好多條,腸粉一邊煎得好香脆,食到蝦米同蔥粒,混埋芝麻、豉油、麻醬、甜醬食。
✣雞球大包 (大點)
係懷舊點心,真係大件夾抵食,皮厚又鬆軟,塞滿餡料:雞肉、叉燒、冬菇、菜粒⋯⋯
✣鮮蝦菜苗餃 (大點)
一籠有三隻,皮煙韌餡料足。
✣百花釀北菇 (大點)
百花係蝦膠,彈牙都幾大粒,但同冬菇分開移咗位。
✣沙嗲金錢肚 (大點)
金錢肚一格格浸滿醬汁濃郁入味,都算幾多件。
✣蒜蓉蒸鮮魷 (大點)
魷魚彈牙,蒜蓉蒸更能提鮮,豆卜吸晒湯汁嘅原汁原味。
✣切肉燒賣王(大點)
一籠有四粒,係經典燒賣口味,手切豬肉粒加蝦做餡料蒸得夠脹身,入口彈牙。
✣四寶滑雞扎 (大點)
有兩件,腐皮包住,雞肉入味,豬肚爽口,芋頭粉淋,魚肚吸湯。
#大榮華酒樓
地址:元朗元朗安寧路2-6號冠煌樓2樓
此物業由您擁有或管理嗎? 免費認領您的企業詳情,即可回應評論、更新檔案和進行更多操作。