真三國無双│林雪演董卓 新西蘭傷腰險墮馬 嫌棄艷女有體味 | 最新娛聞 | 東方新地
未命名-1

真三國無双│林雪演董卓 新西蘭傷腰險墮馬 嫌棄艷女有體味

電影版《真‧三國無双》耗資三億港元製作,由古天樂、劉嘉玲、楊祐寧、林雪及呂良偉等主演,當中被網民一致讚賞神還原「董卓」的林雪,無論在造型或電影中的演繹,都演活了性情殘暴、荒淫的「董卓」,不過神還原的背後其實非常辛苦,經歷炎夏外景及悶熱廠景拍攝的林雪更形容係折磨,有女圍都無福消受喎!

撰文:東方新地 圖片:電影公司發相

真三國無双
林雪演活了電影版《真‧三國無双》中的「董卓」。
真三國無双
電影中的林雪經常被女圍,不過他就嫌班女有體味。

林雪炎夏著古裝極辛苦

電影版《真‧三國無双》於新西蘭實景拍攝,由征戰場面到豪華瑰麗的朝廷廠景、眾英雄造型的一服一兵器,全部打造精美,別出心裁。極具份量的林雪炎夏著古裝,要黐鬚、戴頭飾及披幾層戲服,場場戲大汗叠細汗,睇見都戥他辛苦。

真三國無双
林雪騎住馬好威風,但原來背後困難重重。
真三國無双
導演周顯揚指導林雪如何演出「董卓」的氣勢。

林雪損手爛腳感到值得

問林雪為何當初肯演「董卓」,他笑說:「我接呢部戲時首先睇咗個造型,咦?呢個咪我囉,我先接咋,當然導演都係好有誠意,傾角色時導演真係做足準備。」拍攝披甲上陣的戰爭打鬥場面,林雪演繹得極威武,但其實他身穿的黃金戰衣相當重,又要拎住巨大的鋸齒刀策馬殺敵,少不免損手爛腳,幸好情況不嚴重,林雪謂受傷時都係得個忍字:「你話拍古裝辛唔辛苦?講唔辛苦呃人啫,辛苦到仆街呀!喺新西蘭騎嗰啲馬係本身野外放牧,冇咁易馴服,一轉彎直情想將我成個人拋落地,扭親條腰,好在側邊有個當地馬伕扶住我,不過拍出嚟真係好好睇,辛苦都值得。」

真三國無双
林雪與古天樂有不少對手戲。
真三國無双
林雪話開廠景又無冷氣,好似焗桑拿一樣,拍攝時被多位艷女大包圍,林雪揚言頂唔順班女的體味。

林雪同呂布古天樂爭貂蟬

「董卓」在《三國演義》中另一為人熟悉的情節,要數到跟戰神「呂布」(古天樂飾)爭閉月美人「貂蟬」(娜扎飾),林雪笑說:「我同呂布爭女?佢邊有得同我爭呀?」林雪以往拍戲較少近女色,這次因為飾演好色暴君「董卓」而艷福不淺,他稱拍攝時正值暑假十分酷熱,拍外景固然熱到抽筋,開廠景又無冷氣,所以拍攝被幾位艷女大包圍的廠景戲份,林雪揚言頂唔順:「啲女著到『薄切切』,大家出晒汗,人有體味,嘩!真係頂佢唔順!幾靚女都好,你話我開唔開心呀?我覺得係一種折磨,啲體味搞唔掂,你唔好見我咁肥咁輪盡,我人就唔挑剔,但味覺幾挑剔。」

真三國無双
電影版《真‧三國無双》由周顯揚執導及監製、杜致朗編劇及監製,出品方為太陽娛樂及中國星,並獲NETFLIX以破華語片紀錄之天價購入全球版權。
真三國無双
獲日本遊戲商「光榮特庫摩」(KOEI TECMO)正式授權之電影版《真‧三國無双》,已定於本月29日在港上映。

讀者留言