香港港币100万为何被称作一球？

香港人稱100元為“一舊水”，這“舊”，不是新舊的“舊”，卻是“塊”的意思。

廣東話裡，“舊”與“球”同音而調不同，因而，假借一球為一百萬。

「球」 是來自香港金融界的術語

轉自香港東方日報：

好多潮語其實來自金融術語，好似話「樓價節節向上，『一球球』咁升」，你大概可能知道「一球」即係100萬元，呢個講法喺邊度嚟？

呢啲原來都係銀行盤房嘅行內術語，仲有「碼」、「骨」同「腳」，你識唔識？光大銀行香港分行總經理兼聯席主管顏劍文逐個拆解畀你知。

先講「盤房」，銀行交易室就俗稱「盤房」，係交易員利用銀行資金買賣不同金融資產嘅地方，交易類別包括外匯、債券、利率、衍生金融工具等，交易金額動輒以千萬計，於是發展出唔同量詞嘅術語。

盤房之內，「球」即係100萬。顏劍文話，「球」之上就係「碼」，即係1,000球或10億嘅意思，量度單位來自美式英語1 Billion。

至於「球」下面，仲有「骨」同「腳」。「骨」即係四分之一球，交易員講「一個骨鎊」，就即係25萬英鎊。至於「腳」就係十分之一球，即係10萬，如果有交易員話「兩隻腳Euro」，就係20萬歐元咁解。

點解要咁講法？交易員用術語去「做刁」（Deal嘅諧音，交易也），唔單止為增效率，仲要夠霸氣！顏劍文就以講「100萬」為例，講出嚟「溫吞無力」，但講「一球」就唔同喇，夠快夠勁！

佢仲話，呢啲金融人「母語」唔淨止用喺交易金額，有啲仲係早期香港人會用到，例如佢小時候就會用「兩點一個骨」形容時間，即係2點15分咁解。

嗱袋好啲「碼」、「骨」同「腳」，以後出來行走，莫再淨識得講「球」一味喇！