【落雨又使乜驚呀】86歲夏春秋拖實君如媽冒雨食盆菜 伍衛國唱歌助慶 | 即時 | 娛樂 | 20171119

【落雨又使乜驚呀】86歲夏春秋拖實君如媽冒雨食盆菜 伍衛國唱歌助慶

更新時間 (HKT): 2017.11.19 15:18
攝影:羅慧敏

保良局今晚喺慈雲山舉行慈善盆菜宴,除咗保良主席陳細潔同總理之外,仲請咗朱咪咪、伍衛國等做表演嘉賓,86歲嘅夏春秋都拖埋老婆一齊撐場,君如媽個樣真係同君如餅印一樣。不過,現場突然落起大雨,留低嘅長者都要撐住雨傘食盆菜。

好耐冇喺幕前演出嘅伍衛國話今次係義唱,佢話:「老友邀請我嚟,平時都好少參加咁大宴會,好開心能夠為長者出力,唱歌冇問題,我會唱許冠傑嘅《紙船》,已經好熟,唱咗幾十年,不過o依家已經好少去大陸登台。」佢笑言自己已經退休,閒時打波、游水同出席宴會。」問到o依家係咪嘆世界?佢笑話每個階段做唔同嘅事,冇人搵復出拍戲:「做番適合自己嘅生活,年紀大,記性差,o依家都好少睇電視,或者遇到滿足同有突破角色至會考慮。」

朱咪咪就話落大雨係碎料,仲話好多人都怕同佢合作:「我唱歌冇rundown,通常見招拆招,睇現場氣氛,我有隻CD,入面有200幾首歌,睇吓現場係啲咩觀眾,再決定唱咩歌。」咪咪姐又笑話最近籮柚變咗好多,因為由上個月24號開始,就不停飛嚟飛去做嘢,夾埋都坐咗70幾個鐘嘅飛機,之後搞埋老公生日,就飛返去新加坡。問點同老公慶祝生日,咪咪姐話:「打邊爐,唔得閒送驚喜,第日要去飛,老公仔女從來冇乍型。」

娛聞樂陪你走遍全球追星,即Like「娛果」FB 專頁!
BannerBanner