盡做---基隆茶餐廳Cat姐
Cat姐過去一直提供免費飯支援受經濟封鎖的年輕人。
「早兩日有個細佬來食免費飯，我當時唔喺到，佢食完之後特登再返來，就係想親口同我講聲多謝，嗰一刻係好感動，佢讀港大，二年班！」眼前這位基隆茶餐廳老闆Cat姐感慨地說。
過去一年，香港逐漸形成了黃色經濟圈，說穿了只是簡單地一群憑「良知」做生意的商人，眼看社會不公，大家讓利盡做，「做到就做，我又唔係想搵大錢，夠食、交到租、養得到班伙計就得！」
眼前這位老闆娘叫Cat姐，營運的基隆茶餐廳與旺角警署只是兩條街之隔，剛剛的泛民初選，亦是其中一個票站，「以前邊有諗過自己會做呢啲？我啲朋友成日都叫我唔好行咁前，搞硬你！」她笑說。
Cat姐年輕時是車衣女工，報讀夜校進修，食正香港八十年代的黃金年代，開廠製衣搵真銀，「嗰個年代唔會諗無錢，你肯做就搵到錢！」在商言商，有錢搵邊個唔想搵，然而良知才是做人基本，她食正香港黃金時代，但卻未有忘記照顧社會基層。
90年代，Cat姐轉開茶餐廳，第一間開在深水埗基隆街，命名基隆茶餐廳，當時已經開始幫助露宿者，加入露宿者行動委員會，將一盒盒盛滿家常小菜的飯盒派給露宿者；最近六七年逢初一十五，更會派齋飯予區內長者，其中一日由善長捐贈；最近疫情，Cat姐聯同義工們為街坊送上防疫物資，有些事並非一時三刻，有心的人一直都在付出。
2014年傘運，金鐘、旺角的佔領區，不時都有人將熱騰騰的飯盒送到現場，原來基隆茶餐廳便是其中一員，「好記得當年有個老師帶住學生來買飯盒，原來係拎去佔中現場派，我知道之後就自告奮勇去派飯，初初諗住幾日貨仔，點知搞咁耐，一派就派唔停，做一個蝕一個，不過當年嘅場面真係唔會忘記，我哋努力過，和平爭取過，但喺政權下，都被打沉咗！」眼前這位傻大姐當年蝕住派飯，談到佔中畫面，回憶總是美好，然而現實卻是殘酷。
79天的佔領，換不到香港人心中的「真·普選」，卻孕育出一個黃之鋒，「其實唔可以叫失敗，當年走咗個黃之鋒出來，令到好多年輕人醒覺，等大家都知發生咩事，唔可以好似動物農莊咁，好似舊年到依家，令到更多香港人明白香港發生緊咩事！」
Cat姐過去一直有和義工們派發物資及飯盒給有需要的人士。(受訪者提供)
時至今天，有誰可以去決定勝敗，現實是不少年輕人失去了家。有人常說有國才有家，但沒有家的國，剩下的只是空殼，過去一年不少香港年輕人正正失去了自己的家。根據警方公布的數字，由去年6月至今年4月一共拘捕超過8000人，當中有3200多人是學生，60%是大專生，40%是中學生，不少被捕者得不到家人支援，被經濟封鎖的不計其數，更甚被父母趕出家門，無家可歸。一年間，多少家庭被拆散，多少年輕人被離棄，幸好香港仍有群熱心人支援，為年輕人保留那小小希望。
派飯給露宿者
「初初我哋印飯票，個反應唔太好，之後我派卡片畀班細佬，隨便來食，有時望住班細佬，真係好傷心，明明係你哋個仔女，佢就算喺學校打交被人罰，返到來屋企你都無理由唔理佢，呢啲係你做父母嘅責任來？」Cat姐愈說愈勞氣，她3月時到沙嶺拜祭無人認領的屍體，已經有200多個只寫上編號的小小石碑，碑下的屍體是誰，如何死去，無人得知，她感慨萬分，「真係要鬥長命，唔好放棄自己，好好保護自己，命都無就咩都無得做！」
過去一年，Cat姐招待過不少年輕人食飯，雖無血緣關係，卻慢慢建立感情，情同仔女，「早幾日有個細佬食完飯同我講Goodbye，話要走啦，要離開香港，我好唔捨得，但路始終要行，有得出去闖都係好事！」飯是有價的，信任及情感卻無價，人間有情，便是如此。
電影《十年》中有一節叫《本地蛋》，年紀小小的紅衛兵巡查商店，其中一幕講老闆賣雞蛋，標籤寫上「本地雞蛋」，被年少的紅衛兵記錄，原因是出現「本地」二字；另一幕講述禁書，有班學生要看某一類書，要到一間樓上書屋躲起來看，以諷刺香港未來。
「當年我同大家講，啲人都話點會咁快，你睇依家就係咁啦！」國安法一立，店舖不得貼出含港獨意義的標語，黃之鋒的書要在圖書館下架再審查，無需十年，電影情節一一應驗。
Cat姐經歷過香港的黃金年代，在香港土生土長，看着香港由一無所有，成為國際都市，「人係要向前望，有咩理由行返轉頭，香港有咁大優勢，點解要行返去民革年代？」原來Cat姐十多歲時與家人回鄉探親，正值中國民革，「當年返到去周圍都係屍體，要閂埋門講嘢，家姐當年喺南寧醫學院教授，阿爺係富戶，我哋係黑五類，唔可以同外界聯絡，家姐嫁人都要嫁畀無產階級，個感受好深，點解喺自己國家要咁樣生活？」
國安法立法之後，親政府人士大肆宣揚成效，沾沾自喜沒有人再將港獨口號掛在嘴邊，黃店亦撕走文宣，「你唔畀講未唔講囉，到依家好多嘢已經刻骨銘心，好多香港人已經識得諗！」由去年盛夏，到寒冬，一幕幕場面，早已深刻香港人腦中，同路人，一切在心中。
疫症當前，餐飲業首當其衝，基隆茶餐廳同樣是受害者，晚市生意大減，政府4月中首輪限制食肆措施，要求枱與枱距離要隔1.5米，偏偏基隆茶餐廳成為警方檢查對象，還要連續兩晚突擊檢查，要求員工「熄爐」，又查所有人身份證，兩晚都沒有查到任何違規行為，結果Cat姐損失了數萬元生意。「疫情點都有影響，無咗好多晚市，都係外賣多。」本以為疫情舒緩，生意可以逐漸回復，但第三波殺到，今次政府更下令6點後不得堂食，飲食業更是雪上加霜，基隆茶餐廳每日將晚餐餐牌上載到Facebook專頁，外賣九折，都係那一句，「盡做！」
~ 完 ~
