【熱話】究竟地產經紀值唔值1%佣?
施政報告出爐後,放寬600萬以上私樓嘅按揭成數,地產經紀都落足嘴頭搵客,貴價樓講緊閒閒哋都700幾萬,計埋食買賣雙方1%嘅經紀佣金。
不過人人都有訴求,佣金講緊至少都15萬至16萬,最近終於有人問,究竟經紀值唔值咁多佣金?大家各有各睇法。
值:
1)唔介意賣樓俾1%佣,不過要幫我mark多10%放,兼成功放出。
2)考牌比牌費唔在講,搵盤其實都要好用心機時間,帶你去睇,了解你想要,再幫你去傾去搵。經紀有時為咗一個盤,陪你行足全日,咁嘅服務都值得俾。
3)好來好去,下次有筍盤先會介紹俾你。
4)你比1%佣金啲經紀,佢哋仲要同公司拆數,公司食水深,佢哋都係打工㗎,又唔係老細,放過人啦!
5)與其減經紀佣,不如同佢講唔減佣,但一定要盡傾個價,慳得仲多。
唔值:
1)以前樓平,1%銀碼不大。依家很多樓過千萬,1%銀碼動輒10萬以上,所以唔應該俾足。
2)樓市好同個經紀嘅服務冇直接關係,交投好唔關佢哋事。
3)傾唔到價就唔值。
4)律師讀咁多書,處理咁多法律文件,都係講緊收果7、8000,點解經紀值十幾皮?
5)對於好多人來講,買樓賣樓可能一世人得一次,唔使俾咁多佣討好班經紀。
睇晒雙方理據,之後買樓賣樓點同經紀傾佣,自己決定喇!
來源:香討
===================
19網輕鬆爆料熱線,歡迎舉報老細同事19惡行,立即click入去講畀我哋知啦