大掃除清屋企雜物 「綠在區區」環保回收幫到手

仲有半個月就到農暦新年，過年前當然唔少得要幫屋企做大掃除，除咗要清陳年污垢外，通常屋企都會囤積唔少雜物、舊電器。隨着大眾環保意識提高，唔少人希望盡一份環保責任，拎去回收，但問題就係「唔知頭唔知路」嘞。

三色回收箱同「四電一腦」政策

實施多年嘅三色回收箱大家實聽過，𠵱家每個社區基本上都有設置回收箱，如果住喺公屋，每幢樓宇都設有回收箱，一落樓下就做到回收，非常方便。而近年部分屋苑亦增設玻璃樽、舊衣物、慳電膽、電池等廢品回收點，政府冀將環保意識帶入社區內。

▲ 實際多年三色回收箱

自實施「四電一腦」政策後，市民可以致電指定回收承辦商，佢哋會上門免費回收大小型舊家電，包括電腦、電飯煲、打印機、手機、電話、相機等。

▲ 「四電一腦」的回收熱綫。

回收嘅苦惱

積臣一直都有將物品拎去回收嘅習慣，不過，積臣一直有煩惱，因為知道未必樣樣嘢都可以放三色回收箱，例如塑膠物料。啡色箱一般回收飲品膠樽、個人護理用品膠樽等，詳情可參者綠色和平的文章。但其實日常好多嘢都會用到膠，例如食品包裝最外面層膠、盛載零食嘅膠盒、買咖啡的膠蓋等，佢哋通通都可以回收，但回收箱就唔支持。有新聞報道，如三色回收箱承辦商發現不合規格的回收物品，最終都只會送去堆填區，即係會浪費晒你做環保回收嘅心機。

另外一個問題就係電子產品配件，好似手機火牛、USB綫、手機聽筒等實有喺屋企，呢啲電子嘢放唔到三色回收箱，但咁濕碎嘅嘢Call回收承辦商又好似好誇張咁，而且每到新年，回收承辦商的Schedule都會好Full，市民都要等。

好OP嘅「綠在區區」

積臣最近就發現一個「新」回收點，而且令我「腦洞大開」。其實你話「新」又唔係，但市民好少聽，就係近年陸續喺18區起嘅「綠在區區」設施，旨在推廣社區回收，而且好OP（即係「Over Power」的縮寫，意思指某人太強了）。除咗回收三色箱、「四電一腦」嘅廢品，仲會回收埋上面提到嘅塑膠廢品同電子產品配件，而且有塑膠／鋁金屬層膜嘅紙包飲品或牛奶盒亦都會收。

▲ 綠在沙田。

點解我話腦洞大開呢。事關有一次積臣拎電子產品配件去某個「綠在區區」設施回收，見到有一個外國人家庭，拎住一袋塑膠產品去回收，當中有包裝塑膠、塑膠食品盒、塑膠袋等，積臣於是問駐場職員，原來佢哋會按塑膠產品上既標誌同編號進行分類、回收，要分辦編號其實唔難，𠵱家塑膠產品都會印上相關標誌與編號，一睇就知，當刻幫我解決多年嘅難題。另外，積臣亦都佩服呢位家長，喺小朋友細細個嗰時就教佢哋做回收工作，從小培養佢哋嘅環境意識。

▲ 印有6號塑膠分類標誌塑膠瓶。

另外要提嘅紙包飲品或牛奶盒，其實唔係純由紙製造，係混合咗其他物料，所以唔可以就咁放入藍色回收箱，積臣就見唔少人就咁放入去，其實係錯嘅。𠵱家可以回收紙包飲品同牛奶盒嘅地點唔多，所以「綠在區區」提供多一個回收點。

為咗鼓勵市民回收，你喺「綠在區區」每回收0.5KG，就可以得到一個印，儲滿一定印仔後可以換領禮品，仲可以換米添。不過對於積臣嚟講，環保意義大就一定大過小小禮品嘞。

▲ 綠在觀塘的換領禮品清單

「綠在區區」亦有喺唔同地區設流動回收點同回收車，方便唔係住喺「綠在區區」設施附近嘅居民。

據環境保護署數據，本港都市固體廢物回收率為30%，本身唔算高，但比2017年的32%仲跌咗。積臣認為，政府除了應該增加更多回收點（因為愈方便先會增加市民回收意慾），政府亦都要宣傳廢品回收分類，因為好多人分唔清邊啲嘢可以回收，邊啲唔可以，亦要教育市民廢品要拎去適當嘅回收點啦。

 

【作者簡介】90後製作公司打雜，熱愛打機，亦愛行山吸收靈氣，希望快啲儲夠錢享受人生。