專訪│唐詩詠認性格有缺陷曾令前男友不悅：覺得好多嘢唔使解釋！
睇劇從來都是「追落後」，大概兩三年前吧，終於扚起心肝收看《沒關係，這是愛情》（2014），從此瘋狂愛上，更將它封為「至愛韓劇」，無他，劇本寫得實在太好。
記得其中一集（第九集），編劇盧熙京寫過以下這段對白，同為精神科醫生的池海秀（孔孝真飾）前輩李永珍（陳慶飾）有感而發：「有人講過，世上最暴力嘅說話係，要似個男人，要似個女人，要似個阿媽，要似個醫生，要似個學生呢一類嘅說話，因為每個人都係第一次經歷人生，都會生疏，先至值得同情，所以犯啲錯其實都冇所謂。」聽罷，震撼至深，因為活了那麼多年，面對社會規條那麼多年，從來沒有人會如此認真的說：做人嘛，別逼得自己太緊。
每個人都是頭一趟經歷人生，換句話講，我們沒有人不是在完全不可預計的情況下摸着石頭過河，有些人很豁達，會欣然接受，有些人卻會將自己收藏起來，像唐詩詠那樣，因為自細經歷父母離異，加上箍牙後曾被取笑，這些日積月累的心理陰影，她感到不知所措，索性將內心世界的大門緊緊鎖上，絕不輕易說出想法，結果長大以後，這種性格弱點的遺害愈見明顯，不單止工作上容易撞板，感情世界亦同樣踫釘，那怕被網民奉為「最GFable」的她，早前亮相游大東主持的《講畀大東廳》時也承認，因為性格上的缺陷，以往拍拖時，曾因為把想法過份收藏，令前度男朋友感到不悅：「以前成日都覺得好多嘢唔需要解釋，但可能我嘅表達方式，令對方覺得我唔重視佢。」
4年前，唐詩詠飛往馬來西亞上戲劇班，遇上以惡馳明的Philippe Gaulier，令她重新審視自己，逐漸卸下包袱，打開心房，迎接新的力量，她深切體會到，以往遇到的所有痛楚，都是自我成長的一部份，最重要是時刻提醒自己，如何變成更好的人，為不日出現的好姻緣撒下種子。
主持、撰文：游大東
短片、剪接：呂志豪
攝影：葉志明、呂志豪
特別鳴謝：楊詩敏（蝦頭）
《最後的那一瞬間》動畫短片：受訪者提供
網絡世界從來沒有分集的概念，所以編輯善意提醒，如果要為今集節目寫旁白，不用多此一舉的說「上一集講到......」但專訪的文字卻有必然出現這種考慮，尤其講到一個人的成長歷程和轉變，所以如果讀者沒有看過上集，直接的看今集，無論睇片還是讀字，都難免會有種不明所以的感覺。
靠靜修「自療」 學習放下
上回講到，唐詩詠透過劇場訓練，重新認識自己，逐漸卸下防備，重拾自信，最終憑《不懂撒嬌的女人》中脫胎換骨的演出，成為無綫視后，最近更開始涉足藝術創作，短短4年，演藝事業已出現大蛻變，而差不多同一時間，在偶然的機會下，她參加一個靜修講座，結果嘗試以此「自療」，將從前放下。
「3年前，咁啱有個講座，我一聽到之後，就覺得突然間好Connect到，於是就開始做Meditation，即係自己同自己傾偈，會知道自己好唔開心嘅原因，或者內心一啲好Deep嘅想法，全部都會喺Meditation出晒嚟。」對她而言，藝術與靜修好比兩條黃金鑰匙，一次又一次令她打開緊閉多年的心房。
專訪│唐詩詠入TVB因性格屢撞板 遇戲劇大師放下包袱：佢鬧我垃圾
唐詩詠借創作劇本首度解開童年心結：阿田同翠如都話從來冇聽過！
游大東其他文章：
【講畀大東廳第七集】TVB拖累港劇發展？林保怡指觀眾同樣有責：你可以選擇㗎嘛！
【講畀大東廳第六集】周家怡埋怨林保怡 拍《歎息橋》沒份去比利時：編劇只我講電話
【講畀大東廳第五集】拍《金都》與鄧麗欣演床戲勁緊張 朱栢康：最驚畀人話鹹豬脷！
情感過份收藏 令前度男友不高興
「我啲朋友都會覺得好奇怪，起碼要識我超過十年，先可能會聽到我講一啲好內心嘅嘢！」不止交友，這種性格弱點的遺害亦見於男女關係之上。唐詩詠承認，以往拍拖的時候，縱然已讓另一半看到一般人無法窺探的真我，但日常相處，仍然不習慣講出自己的想法，因而令前度男友不高興。「拍拖嘅時候，我發現咗自己喺呢方面有一個好嚴重嘅問題，亦係我唯一覺得做得唔好嘅呢，就係我成日都覺得，好多嘢係唔需要解釋。」她沒有點名說，自己所指的前度是哪位，只提供具體事例，讓我了解她哪裏做得不夠好。
「譬如有時候佢畀雜誌寫到，佢會話：『喂呀，你要講兩句㗎！」但我就會答佢：「哎呀，唔使啦！」其實呢個『唔使』，並唔係話唔重視佢，唔想幫佢，但可能我嗰個表達方式，會令佢覺得我唔Care。」也許是當局者迷，唐詩詠事後才明白，面對無止盡的八卦炒作，再加上網民利用鍵盤撥火，如此「佛系」的公關技巧反而帶來更多傷害，「我發現咗，年代真係唔同咗，而家網絡實在太快，原來你一唔講（回應），嗰件事一走咗（持續出現而失去主導權）就會發酵，所以嗰陣時我自己都Handle唔到呢一樣嘢。」經一事長一智，如果是今天面對同一種處境，唐詩詠坦言一定會主動回應，「而家我會講多好多嘢，唔好等佢諗歪，因為一諗歪咗、誤解咗嘅話，就好難救得番。」
罕有提及亡母 於心有愧一度哽咽
心境轉變當然好，更重要是需要有人跟自己實戰，問題來了：感情空白了好幾年，有人追求嗎？唐詩詠聽罷頓了一頓，然後這樣說：「我諗就算有，我都想畀自己獨處一下，我好想自己同自己相處，而我亦都覺得呢個過程係會令我變得更加好嘅，我諗如果將來再遇到（緣份）嘅時候，會係喺一個自己更加好嘅狀態之下再去了解。」愛情路上還未找到對的人，不要緊，唐詩詠慶幸身邊還有好朋友愛錫，除了可以「孖住飛」去紐約的黃翠如，以及一班「鐵馬家族」成員（鄭嘉穎、馬國明、林子善，黃嘉樂）之外，論圈中摯友榜首，不得不提田蕊妮。
三年前唐詩詠奪視后當晚，上台領獎前先緊抱阿田，上台後更公開感激她多年來不離不棄，「佢教我做戲，教我做人，佢成日都聽我呻，佢又肯陪我瞓，佢每次鬧完我，話完我之後，佢最後都會講一句：『你要記住，你係好好㗎！』多謝你，田蕊妮小姐！我一直等緊，我可以喺台上面多謝你，我記得㗎。」唐詩詠承認最初加入無綫時，面對複雜的人際關係曾感到「水土不服」，到底她跟阿田怎樣一步步成為好姊妹？唐詩詠竟然話：「可能我太煩喇！」而那夜在頒獎台上，唐詩詠亦公開感謝2009年因為心臟病而離世的母親，雖然事隔已超過10年，但唐詩詠承認對於亡母於心有愧，更一度忍不住哽咽......