唐奕聰安息禮拜今在灣仔舉行 太極隊員扶靈送別亡友 | 蘋果日報

唐奕聰安息禮拜今在灣仔舉行 太極隊員扶靈送別亡友

更新時間 (HKT): 2021.03.26 15:19

太極樂隊鍵琴手唐奕聰(Gary Tong)本月2日在家中疑因心臟病發猝逝,終年57歲。Gary太太謝玉霞今日於灣仔循道衛理聯合教會國際禮拜堂,為亡夫舉行安息禮拜。禮堂上佈置簡潔,中間放着穿着黑色西裝的Gary遺照,遺照下是Gary遺孀謝玉霞的花圈,兩旁是親友致送的白色花牌。Gary靈柩安放在白色的西式棺木內。安息禮拜儀式於下午2時半開始,禮堂下有約50名歌迷等候入內送別Gary,歌迷需要事前登記,並由工作人員核實身份。儀式開始時,先由牧師致詞,繼而是太極樂隊成員在台上獻唱《Amazing Grace》。接着台上屏幕播出Gary生前片段及他創作的歌曲《一生不再說別離》,歌曲播放完畢後,在短片中的Gary說:「我自己忠心感謝天父、主同好感謝各位。」

李忠希感激Gary帶入行

Gary表弟李忠希在禮拜堂外負責接待親友,而太極成員包括盛旦華、鄧建明(Joey)、雷有輝(Patrick)、朱翰博(Ricky)、劉賢德及前太極經理人(Gary姐夫)鄧祖德擔任扶靈儀式。許志安、蔡一傑、鄭中基、謝天華、張敬軒、麥家瑜、盧巧音與老公、鍾舒淇夫婦及不少幕後音樂人、排舞師與化妝師都有到來送別Gary。

Gary表弟李忠希在安息禮拜堂外接受訪問,他表示靈堂內表嫂(Gary遺孀謝玉霞)與Patrick喊得最犀利,而Gary的壽衣則由表嫂負責決定。安息禮拜儀式上,李忠希的哥哥Jason負責致辭。Jason在台上說:「Gary係4兄弟姊妹中排行最細。記憶中Gary好鍾意畫畫,屋企有好多畫布,畫咗好多科幻同實驗性嘅畫作。Gary音樂天份係受媽媽薰陶,因為家中經常播着各式各樣嘅英文歌。」李忠希接受訪問時說:「今日勾起咗好多回憶,以前Gary Tong同我講咗好多嘢,教我好多嘢,可能以前細個就未必明白佢講乜,而家大個就知道,喺娛樂圈打滾20年先明白。總之要把握機會,做多啲嘢,識多啲嘢,要有幾手準備,唔好單一方向發展。經歷今次就明白要珍惜眼前人,最遺憾係近幾年同佢見面但冇影合照,最近合照都係以前做嘢時影嘅菲林相片,啲相開始褪色。」李忠希表示非常感激Gary帶他入行,他說:「但我冇親口同佢講過,希望佢在天之靈會知道我係感激佢。」

承諾演唱會預留位置

而負責扶靈的太極成員,在禮拜堂外接受訪問時,眾人神情肅穆,Joey Tang眼眶泛紅,他說:「今日見Gary最後一面,佢OK靚仔,今朝心情動盪啲,覺得呢個日子越嚟越近,而家心情就平復咗。」Patrick表示:「同Gary太太講咗喊埋今日,大家就要收拾心情,相信Gary都想我哋繼續向前行,多謝佢對我哋嘅愛,我哋會一直思念佢,積極面對人生,正如Gary所講,人生短暫,唔知幾時會有事發生,我哋要把握每一日,享受每一日,珍惜身邊人,相信Gary沿途會守護我哋。」

Ricky指Gary遺容安詳,希望對方能開心去到另一領域,舒舒服服地生活。至於盛旦華在接受訪問時,表現頗激動,聽着隊友憶述Gary生前點滴時,一直搖頭嘆氣,另外劉賢德肉緊地搖頭說:「好掛住佢,好想佢醒返,我哋會延續Gary創作音樂嘅哲學,沿用佢對音樂嘅包容性。」問到Gary有否未完心願,眾人指Gary份人好簡單,喜歡美食熱愛作歌,他們知道Gary早前在錄音室籌備一個特輯,會繼續做下去。另外亦會替Gary幫麥家瑜繼續作歌,至於太極演唱會,他們透露會繼續籌備,問到會否加入新成員,Ricky說:「可能佢好小器喎,我哋一定會留返個位畀佢。」

Gary前年心臟衰竭領洗後康復

Gary遺孀謝玉霞(Lotty)到台上分享跟亡夫生前相處故事,盡量抑壓傷痛心情的她表示Gary因突發心臟病發而離世,她指Gary除了音樂與畫畫了得,入廚也有一手。他40多年的音樂路上,擔任過唱片監製、音樂總監、作曲、編曲、填詞及太極樂隊的鍵琴手,Lotty順道感激一眾太極隊友。

Lotty大讚Gary性格「和平、忍耐、良善同信實,但節制就差少少,因為佢好鍾意食,佢做嘢會好投入,就係咁做壞咗身子。佢自細有心漏病,自細身體好虛弱。」她再指Gary只是簡單學了2、3年琴,但卻沒有練琴。

談到Gary作為丈夫角色,Lotty忍不住抽泣說:「佢好錫我,好就我,好孝順老人家,係好丈夫,我返學時候,佢會負責照顧我媽媽,推住輪椅帶佢去飲茶。記得有次我媽媽床頭櫃壞咗,好𤷪𤺧,佢就即刻走落街買材料,然後成身汗走番上樓,仲整番好個床頭櫃,我媽媽好開心咁攬住佢,我媽媽好錫佢,我奶奶都係一樣。」

Lotty再指Gary一生遇到好多家人朋友,還有一班好好的太極隊友,而信仰也令他人生變得豐盛。Lotty指Gary前年1月8日因心臟衰竭,醫生也指情況不樂觀,當刻Gary信奉了主,並在兩星期後康復出院。在Gary人生最尾一刻,為一間荷蘭教會親自彈奏及灌錄詩歌《為何對我這麼好》,現場接着播出Gary最後彈奏的作品。追思儀式最後,一眾親友排隊瞻仰Gary遺容作最後道別,過百歌迷輪候瞻仰遺容,數量陸續增多。

遺孀登上靈車陪伴最後一程

安息禮拜儀式結束後,Gary靈柩由太極隊友扶靈下移出禮堂,隨即奉送哥連臣角火葬場作火化,部份親友登上門外等候旅遊巴,太極五子則紅着眼登上7人車前往火葬場,當中以Patrick最為傷感。安放Gary的靈柩由工作人員扶上西式靈車,跟隨有一位女工作人員將Gary遺照先放好在車上,而Gary的遺孀Lotty則沒有跟隨親友步伐,而是由另一名女親友陪同下乘坐電梯到地上,雙眼通紅神情哀傷的她全程低頭步行至靈車,然後坐在Gary的遺照旁。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner