【咖啡經濟學】每日少飲一杯咖啡　就可以變成有錢人？

香港人愛飲咖啡提神，幾乎成為打仔工嘅「精神食糧」，連鎖咖啡店都好識做生意，開到梗有一間喺你左近。好多時睇一啲有關理財嘅文章，其中一個Point都係話：每日飲少一杯咖啡，會幫你慳唔少之餘，仲可以幫你致富。其實積臣聽完之後都有好多疑惑，香港物價咁高，喺咖啡慳到嘅錢，都唔夠係其他地方用啦，𠵱家50蚊都買唔到三餸一湯喇！

▲ 每日少飲一杯咖啡　就可以變成有錢人？

少買連鎖咖啡店咖啡

戴頭盔先，積臣係同意飲少啲咖啡的確係慳到錢，特別係連鎖咖啡店啲咖啡。簡單計下數，假設一杯咖啡係35蚊，每日買一杯，一年開支已經係12,775元。或者有人會話︰邊有咁多人咁癲一日買一杯㗎！咁就當一星期只買4杯，一年嘅開支就係6,720元，即係一星期買少3杯咖啡，一年咖啡開支已經少近半。不過，慳到嘅呢一筆錢，連買最新iPhone都唔得……

如果一定要飲咖啡提神，但又想慳啲，唔少打工仔會買大罐裝即溶咖啡，一大罐足夠飲到一個月，除返勻每日只係約3蚊杯，一年嘅咖啡開支1,000元就搞掂。有人會話︰橫睇掂睇，一年咖啡錢都唔多，當係必須品用咗佢喇！（題外話，曾經有調查指部份牌子嘅即溶咖啡嘅毒素超標，所以都係少飲為妙！）

慳到嘅錢做資本增值

不過，識得「節流」係重要，但同時都要識「開源」，有冇諗過每日少飲1杯咖啡，30年就有可能「袋返」到69萬元！

哇！咩咖啡會咁貴啊？其實只係利用慳咗嘅咖啡錢，去進行資本增值，69萬係複利計算嘅結果，Compound Interest小學都有教喇，歌仔都有得唱「利疊利，利疊利，認真和味」！不過呢，大家就係會經常忽視咗喺生活上嘅應用。

複利嘅威力有咁大咩？愛因斯坦曾經講過「複利的威力遠大於原子彈。」咁就要計下數喇。如果每月用1000蚊咖啡錢拎去投資，持續30年之後，係不同嘅回報率之下，可以得到下表嘅累計回報。

年回報率	10年	20年	30年
4%	$147,249.8	$366,774.6	$694,094.4
8%	$180,000	$590,000	$1,490,359.4

睇到啦！投資年期愈長，你嘅回報愈大。比較4%回報同8%回報，10年的回報相差約22%，30年嘅回報差距就擴大到約60%。儲得愈多、愈早開始儲，你得到嘅回報就愈多。

簡單一個道理點解好似好難做到？

講得咁好，點解好多人都做唔到呢？我諗最主要嘅原因就係缺少咗耐性，對「細水長流」無興趣，又覺得每月閘住一筆錢又好似好唔抵，寧願拎一大筆錢去投資，就想幾個月內賺到大錢，但好多時都變咗「贏粒糖、輸間廠」，得不償失。

坊間有唔少投資產品都有複利效果，例如月供基金、月供股票、月供保險，就算大家好唔鐘意嘅MPF，都係同一個道理。積臣明白，唔少人更情願將呢筆錢增加自己嘅社會資本，但所謂嘅機會往往都係身邊，又正所謂「小數怕長計」，儘管只是每日1杯咖啡錢，如果可以將慳到嘅錢好好利用，30年後就足以改變人生啊！

其實要做好投資理財，並唔需要好多錢，重要嘅係積少成多，而且踏實咁去做。

 

【作者簡介】90後製作公司打雜，熱愛打機，亦愛行山吸收靈氣，希望快啲儲夠錢享受人生。