用吴语正字书写一段文字是什么感觉？

沒啥特別個感覺，兩三年以前我也寫過箇種文字，當時覺著邪氣好白相，但是因為中國人基本浪已經接受北京閒話對應唯一個漢字標準，所以我寫個箇種物事也弗撥大多數人接受，伊拉（即使是同一個地方個人）反而還覺著箇能介佬怪個。阿拉爺娘、老師咯啥，也沒幾個人高興去理解迭種物事個能力搭動力個。

現在我也懶得弄箇些哉，反正弄勒再多，也沒礙法拿吳越人民箇種小作坊心態變脫，大家肯定還是拿牢自家小方言弗肯接受隔壁頭個方言，所以有辰光兩個人明明聽得懂，反而見面以後叭叭叭一記頭儕講普通閒話。箇個是吳越人民個通性，阿拉吳越人民當時跑到香港，基本浪講勒一口標準國語。弗要講埃個辰光個香港，就是勒垃上海，民國辰光個上海，上流社会也是國語講了算個。

好像，對於吳越人民來講，國語正正好就是表現自家文化地位個工具，外加從歷史浪來講吳越人民也從來沒對國語有系統性個弗歡喜，國語書面詞語也是用文讀搿方式跑到閒話裡向個。上海閒話文讀詞語發音是從杭州閒話裡向來個。