父子雙聲道 夏春秋 吳君祥
父親的身影，在子女心目中，總是巨大的。
對於吳君如弟弟、江美儀男友吳君祥（Vincent）來說，在眾人眼中看似幽默風趣的冬叔（夏春秋），卻是一位嚴父。「你哋唔好以為喜劇演員，無時無刻都咁搞笑，其實佢哋平時一啲都唔好笑，而且仲好嚴肅！好似我爸爸咁，細個雖然佢好少打我，但每次我曳，佢只要一個眼神，我已經好驚，所以佢係媽咪對付我嘅王牌。」
雖然Vincent自稱畏父，但在冬叔口中卻不是如此，「Vincent細個都幾百厭，又成日扭計，記得有次出街，人哋話明油漆未乾，佢就以為自己係大明星，走去打手印。我作狀打佢，佢竟然夠膽死叫阿媽換咗個老竇！你話佢有幾驚我嘞！」
父親節將至，看着這兩父子你一言我一語的互動，溫馨滿載。
坐在鞦韆上的冬叔，擺出鬼馬的甫士，回憶當年帶子女到公園的點滴。「Vincent最鍾意打鞦韆，次次都唔怕高，係咁叫我推高啲。」
兩年前，吳君祥與父親到日本箱根參觀神社和品嘗當地的美食。
百厭星
冬叔原名吳錦泉，已八十四歲的他，依然聲如洪鐘。訪問當日，他與冬嬸一同現身，並帶記者到他們昔日經常帶子女遊玩的「兵頭花園」（動植物公園），回憶與子女的點滴。冬叔笑說：「我哋都好多年無嚟過啦！以前住中區，每逢假日，都會帶佢哋三姊弟嚟呢度玩，但後來搬咗去北角，就少嚟咗啦！」
行到動物區時，冬叔指着籠內的猴子笑說：「Vincent細個最鍾意嚟睇馬騮，佢細細個就好活躍，跑來跑去冇時停，我哋成日都笑佢似馬騮。」
五十年代已加入麗的(亞視前身)的冬叔，曾經做過酒樓、酒店、夜總會和寫字樓等工作，養活一家五口。「以前為咗搵食，無嘢拍就要做其他嘢，所以我做過好多行業o架啦！不過，就算幾忙，每逢假期一定會陪佢哋三姊弟去玩。以前我喺珠城酒樓做經理，星期日無假放，都會叫老婆帶佢哋嚟飲茶，之後再去維園玩，總之我一有時間，就會陪佢哋，所以我同三個仔女嘅關係，由細到大都好close。」
冬叔坦言，三名子女中，排行第二的兒子吳君祥是最百厭的。「Vincent好難搞，細細個已經有好多自己嘅想法，去到酒樓又鍾意捐枱底、去到公園又鍾意周圍跑，所以同佢去街都用幾多體力o架。記得有次佢用竹打媽咪，我就好大聲鬧佢，話佢咁曳成日唔聽話又打媽咪，我唔要佢；之後佢竟然同媽咪講，話呢個老竇咁惡，不如換咗佢啦！佢就係咁o架嘞，成日諗埋啲咁嘅嘢。
「Vincent仲好貪靚又滋油，約佢十點，佢十點仲喺屋企梳緊頭！我記得佢返中學，最鍾意着啲好時髦嘅尖頭鞋，我叫佢返學着得踏實啲，佢駁我咩我都唔記得嘞！總之佢有佢道理啦。不過，我份人都好民主，由細到大都畀佢哋自由發展，鍾意做咩都由得佢哋，只要唔好行差踏錯，開開心心就OK！」
當年每逢假期，冬叔總會駕車，帶着冬嬸和三子女到新界遊玩，享受家庭樂。左一為吳君如。
