吳大強吳偉豪演父子戲感人 徐榮重遇失散廿幾年細佬 劇集《飛常日誌》話咁快就進入尾聲,除咗核心主角發生嘅故事有趣之外 ,客串飾演失智症伯伯嘅吳大強都有所發揮,喺呢集仲為觀眾帶嚟一個驚喜關係,吳大強飾演嘅福伯喺機場禁區範圍等待兒子嘅一幕掀動人心,令失散多年嘅兄弟徐榮同吳偉豪(Ricco)相遇,大強同Ricco再一次真父子檔合作,場面感人。 Ricco覺得今次同爸爸嘅合作好有新鮮感,更大爆攝前兩父子都有啲緊張:「因為拍戲我一定在行過爸爸,驚做得唔好會失禮,所以有啲壓力。」Ricco覺得爸爸每次接觸演戲都有進步,對於爸爸難在於唔知自己表現係點,但幸好之前拍攝《愛·回家之開心速遞》好快就播出,到《飛常日誌》只係相隔兩個月左右就睇到演出,等佢可以知道自己表現,希望爸爸繼續進步。 今次喺劇中飾演航空學院學員嘅Ricco,經常要拍住一班年輕聲夢學員,為咗同佢哋打成一片,Ricco話會主動同佢哋溝通,盡量散發多啲青春氣息,唔好畀人覺得年紀好大差距,大家都合作得好開心。 #飛常日誌 #吳偉豪 #吳大強 #徐榮 #愛回家之開心速遞 #失智症 #機場禁區範圍