【同盟】劇情套路熟口熟面 大家估吓真死定假死！
《同盟》剩番最後兩集，有追開嘅朋友都睇到咬牙切齒，除咗齊齊玩無獎競猜遊戲，估下誰是big boss，仲要集集死幾個，睇到大家一殼眼淚，尾三呢集又有3位大家熟悉嘅角色死咗，究竟佢地係真死定假死？陳展鵬真係變奸定又嚟計中計？好亂呀﹗
自播出以嚟，數數手指《同盟》中壯烈犧牲嘅已經有薇姨、Ricky、Kate兩個哥哥George 同Michael、韋爺、令烈……尾三一集再死3個！
先有梁烈唯跟蹤可疑人被鄭子誠發現，捉住佢毆打逼供，鄭子誠想放走唯唯，點知Rainman手下拒絕，作惡咗咁多集嘅鄭子誠咁就被槍殺；陳展鵬胡定欣趕到救唯唯，亂槍掃射下走漏一個，唯唯飛身為兄弟擋子彈，陳展鵬悲痛莫名埋下變奸種子；令家上下不停收到Rainman分化大家嘅訊息，人心惶惶日嘈夜嘈，楊卓娜唔知邊度變支槍出嚟，林子善韓馬莉又想夾埋毒害鮑起靜，鮑姐出苦肉計，注射藥物假死，陳展鵬去見Rainman扮變節，點知一早被對方識穿將計就計，鮑姐就喺陳展鵬面前過身。
不過網民普遍唔多相信一代霸主令熊咁就拜拜，覺得扮死呃Rainman機會甚大，有人甚至話其實薇姨根本無死，瞓喺度嘅係薇姨嚟咋！至於陳展鵬自開槍殺Ricky起已經埋下變奸伏線，唯唯同鮑姐嘅死更加令佢眼神起變化，好兇狠呀﹗預告仲話佢同陳山聰打起上嚟添。
不過咪住，點解D鋪排咁熟口熟面？原來同《城寨英雄》以及《使徒行者》套路非常相似，咁啱三套劇都係文偉鴻做監製噃。《城寨英雄》結局篇集集死幾個，花曼貓仔死嗰兩集到宜家仲歷歷在目；至於《使徒行者》中歡喜哥明明死咗，去到電影版又翻生，仲有苗僑偉飾演嘅卓Sir終極變節做黑警，原來係計中計對付幕後黑手。咁推論落去，《同盟》中鮑姐應該係扮死，而陳展鵬就扮變奸同Rainman合作，等機會反擊。仲有兩集，好快就知劇情係咪咁發展，最後BBQ跳起YEAH啦！