【明報專訊】想去旅行但搶唔到平機票，不坊考慮吓航空公司嘅機票套餐，近日香港航空同大灣區航空分別有唔同優惠，香港航空推出年票，有台北、大阪、東京、曼谷等航點揀，分3套或者5套來回機票，3套來回台北4200元，即係每次來回只係1400元，包20公斤行李，而且可免費改期。
大灣區航空嘅套票就包東京、大阪、台北、首爾4個航點，都係3套來回機票，價錢更平，3套來回台北連20公斤行李1980元，平均每程來回660元，不過要預先揀定3張機票日期一齊出票，而且得第二、三次來回航程可以免費改期。
港航嘅年票即日起至7月31日有售，經濟艙同商務艙都有年票賣，5套來回東京商務艙套票1.8萬元起，每程3600元就有得坐商務。3套來回機票限一人用，5套來回就可以兩人一齊用。
至於大灣區航空套票即日起至6月30日有售，限今年3月1日至下年3月29日出發，只限一人用。Emily覺得2880元嘅日韓套票最抵，包一程首爾，另外兩程可以揀東京或大阪，一份套票可以去晒3個地方。
不過要留意，兩間航空公司嘅機票套餐喺節日假期等指定日子唔適用，而且價錢未包燃油附加費同稅，大家買之前記得睇清楚條款喇。