2018港人10大人氣旅遊熱點 潮玩石垣島 探秘莫斯科

黛安同唔少香港人一樣，閒時最鍾意周圍去下旅行，好好放鬆一下，不過去得多台北、東京等熱門城市，都想發掘下新地標。Expedia最近公布咗2018年港人10大人氣急升嘅旅遊熱點，其中高踞榜首嘅，係日本沖繩嘅潛水勝地石垣島，仲有俄羅斯、越南等選擇，以後想去旅行又多幾個地方揀喇！

聽日就係2019年，不少打工仔已開始部署新年嘅旅行計劃。黛安知道，網上旅行社Expedia最近公布咗2018年最新嘅旅遊數據，發現截至11月底，今年5大最受港人歡迎嘅外遊目的地，依次係曼谷、台北、東京、首爾同大阪等熱門城市，但唔少新興嘅旅遊景點反應都唔差！

其中一個「10大人氣急升旅遊熱點」，除咗排頭位嘅沖繩石垣島外，第2同第3位都係因世界杯熱潮帶動嘅俄羅斯聖彼得堡同莫斯科，仲有越南芽莊、日本福岡同「南極光勝地」新西蘭基督城等，全部城市升幅由90%到1.65倍不等，認真犀利！黛安仲發現，喺新興旅遊熱點中，有一半都係以「陽光與海灘」為賣點嘅熱帶度假天堂，好似因粉紅沙灘而成「打卡」之選嘅印尼龍目島、海天一色嘅斐濟楠迪等。

Expedia董事總經理（亞太區主要市場）蘇嘉媛同黛安分享，預計來年有航空公司開辦日本德島新航綫，四國會成為港人旅遊新寵，到時飛抵德島，遊覽完「阿波舞之鄉」，再沿高知、愛媛、香川玩盡四國！如想追尋更冷門獨特體驗，佢再推介秘魯嘅彩虹山，由彩色砂礫岩構成嘅天然美景，絕對係一生人必去之選。