請到留言撳link睇片

由邱禮濤執導動作特技電影《#掃毒3：人在天涯》，上畫11日（截止6日）香港及澳門累積票房衝破1千萬。除有 #古天樂、#劉青雲 和 #郭富城 三大影帝主演，還有幾位「綠葉王」助陣，包括林雪及袁富華（Ben）。

#林雪 飾演黑幫份子肥雄，其中一場遭被捕戲要戴上手銬，由於林雪的手腕太粗，幾乎扣不上，弄致手腕紅腫，最終改為雙手放身後，用外套遮蔽，他說：「通常冇拉過咁肥嘅人，但都克服到困難，只係痛啲，雖然夾到雙手紅晒，但冇所謂，最重要係配合導演拍攝。」

在埋位等待期間，林雪又踎又企很靈活：「唔好睇我咁肥，以為我身體唔好，其實我好健壯，我可以踎低起身，其實我係個好演員，都要keep好自己身體。」

在戲中飾演醫生的 #袁富華，跟古仔有一場對手戲大鬥演技，他說：「我唔敢稱呼古仔，我叫佢古生，今次同古生合作，感覺好強烈，因為係直接受壓力嘅場口，有一種無形壓力，佢行過嚟將劇本增加到唔同層次，令我有好深感受，到而家都未驚完。」

除了兩位綠葉王，還有視帝 #羅嘉良 客串演大毒梟，已有17年沒拍電影的嘉良表示，以前未做過這類角色，所以看了很多紀錄片做功課，看真正的毒梟是如何生活，做過甚麼手段。

在戲中他跟劉青雲都是扮演毒梟，原來兩人是首次合作，嘉良表示：「武指設計咗一場動作戲，青雲拔走我支槍，然後插入我嘅褲頭，我覺得呢場動作好精彩，觀眾看到會心寒。看到青雲為角色設計好多，幾生活化，絕對係影帝。」