雅虎香港新聞 古天樂驚爆年底結婚😱？瘋傳與螢幕女友宣萱修成正果 粉絲紛紛留言：「希望傳聞是真！」
娛樂圈中有唔少藝人都因為拍戲、拍劇而拍出愛火，戲假情真到最後仲拉埋天窗，戲裡戲外都成為一對。螢幕CP成為真實情侶，粉絲見到呢種情況當然都會特別開心。最近都有一個粉絲驚喜嘅消息爆出，話古天樂同宣萱呢對《尋秦記》情侶檔撻著，更有指兩人仲打算喺今年年底結婚添。雖然呢個消息仲未得到任何一方嘅證實，但消息一出已經係網上瘋傳，粉絲都已經開心住先，仲留言希望呢個唔係假消息，因為佢哋兩個真係實在太襯喇，俾個機會大家FF下都幾好呀！
古天樂同宣萱呢對「螢幕情侶」塑造過《尋秦記》、《寵物情緣》以及《刑事偵緝檔案Ⅳ》等非常經典嘅情侶角色，兩人喺螢幕上相當般配令唔少粉絲都希望佢哋可以真正拉埋天窗。雖然消息可信度唔高，但一班粉絲已經開始失控狂留言催婚，表示夢想成真。
就算消息幾假都好，古仔同宣萱都可以借呢嘅機會睇到有幾多人支持佢哋喺埋一齊。
男未婚、女未嫁，會唔會考慮順應民意，成為真情侶呢？
驚爆結婚！古仔為婚禮買遊艇？
最近圈中頻頻爆出大新聞、林志玲結婚、雙宋離婚、李晨范同冰冰分手... 再出啲咩新聞大家可能都會覺得見怪不怪，淡定以待，但古天樂同宣萱準備年底結婚呢個消息一出，都即時成為網民熱話，因為呢一對，大家已經等咗好耐喇！
古仔同宣萱演過好多次情侶，螢幕情侶嘅形象已經深入民心，再加上兩人都係直來直往嘅性格，戲外亦係相識多年嘅好朋友。有網民爆料宣萱同古仔齊齊參加演藝人協會飯聚時舉止非常親暱，仲不停交頭接耳，更指出當時古仔嘅一班圈中好友都有攞佢同宣萱做話題，頻頻起哄。
早前有傳聞話古仔豪擲五千萬港幣買咗架遊艇送俾媽媽做母親節禮物，諗唔到古仔除咗捨得洗錢做慈善之外仲好捨得買禮物俾媽媽。不過之後又有傳聞話其實遊艇係為年底同宣萱婚禮而準備嘅。
早前宣萱主演嘅舞台劇公演，古仔被影到送咗好大一紮玫瑰。
朋友間其實送花都係正常嘅事，不過結婚傳聞傳出嚟之後，唔少網民突然覺得古仔好浪漫呀。
有網民話宣萱同古仔就連BB樣都襯都絕，真係應該快啲拉埋天窗。
感情早有預兆 宣萱認對古仔戲假情真過
古天樂同宣萱憑劇集《刑事偵緝檔案Ⅳ》一齊登上視帝、視后嘅寶座，後嚟接受訪問時，宣萱坦言對劇中古仔有動心過，不過古仔就話拍劇嘅時候顧住拍劇，收工之後情緒都比較低落，更加唔會同劇組女演員有接觸，所以唔存在戲假情真嘅事情發生。搞到宣萱無耐表示：「所以我咪拍得好過你咯。」
無論係神女有心，襄王無夢，定係兩人彼此欣賞，互相愛慕，畢竟大家嘅年紀都唔細，都要把握機會，畢竟再錯過，就係一輩子。
宣萱至今未婚，佢喺訪問中提到自己對結婚同生小朋友都已經冇咩想法，唔知古仔能否重新點燃佢對婚姻嘅希望呢？
宣傳新戲定確有其事？ 粉絲盼古仔成家立業
古天樂同宣萱早年拍嘅無線劇集《尋秦記》相當經典，做咗大老闆嘅古仔一直都好想揾返原班人馬嚟拍電影版，今年年初終於成事，喺橫店正式開機。除咗有宣萱、林峯、郭羨妮、滕麗名等回歸之外，連已經息影好耐嘅雪兒都俾古仔叫返返嚟拍戲，Fans們當然非常期待喇。
當年古仔飾演嘅項少龍，同宣萱演嘅烏廷芳呢一對係好多劇迷心中嘅完美情侶，而古仔同宣萱兩人亦因為劇集結下深厚嘅友誼。唔少粉絲私底下都希望兩人有朝一日可以戲假情真成為一對，宜家宣萱加入到古仔旗下娛樂公司，就算兩人並非真係結婚，相信佢哋一齊合作嘅機會都唔止電影版《尋秦記》咁少。
最近古仔同劉德華、苗僑偉主演嘅新電影上演，好多人都估呢個傳聞係為新戲造勢而已，不過說到底，大家都心急想古仔可以快啲成家立室。
要數古仔上一次緋聞，大概係佢同郭采潔之前拍電影嘅時候，兩人好快就出嚟澄清，至於古仔最後究竟情歸何處，真係要等佢本人嚟為大家揭曉喇。
推薦閱讀:
➤ 【有聲有畫！】古天樂人妻Kay激罕浴室合唱拍MV 麥浚龍新作《（一個男人）一個女人和浴室》 狂派驚喜
➤ 【影帝的小鮮肉時代】這班女歌手的 MV，那些年古天樂原來都有客串過…
Follow us on:
Facebook: CosmoHK
Instagram: @cosmopolitan_hk
YouTube: CosmopolitanHK
