勁尷尬 古天樂拒絕評論聲夢學員「唔講啦，完」原來有外傳？

《聲夢傳奇》上星期舉行完決賽，對比起比賽初段嘅無聲無息，各位參加者嘅人氣總算喺比賽後期有所提升，決賽嘅直播收視仲有接近24點，算係扳回一城。而8月中TVB為聲夢學員舉行演唱會，3場門票短時間內售罄，睇個勢唔錯，但業內人士又點睇呢班新人。

尋日聲夢三甲炎明熹、姚焯菲同鍾柔美出席活動，同場仲有新一代電影大亨古天樂。活動後一段訪問片後被瘋傳，當時記者希望古生評價一下聲夢學員，古生聽完之後就放低手上嘅咪，補多句「聲夢就唔講啦」，再加多句「完！」，搞到企喺旁邊嘅TVB娛樂新聞台記者好尷尬！

唔少人都估，古天樂呢句「聲夢就唔講啦」係咪已經表達佢對聲夢學員嘅睇法，亦有人拎出同場另一段片作補充。第二條片入面，有記者問古生「有冇睇過佢地（聲夢）比賽」，古生話「睇吓唔睇吓……有嘅」，靜咗2秒之後再講句「唔該晒！」就走人。到底古天樂答「聲夢就唔講啦」，係因為之前有人問過唔重覆回應，定係其他原因？

向來古天樂都好肯支持後輩，早排MIRROR演唱會佢都有去睇show，又同ERROR一齊拍廣告仲攬頭攬頸。而聲夢一直都被視為TVB用作對撼Viu旗下男團MIRROR/ERROR嘅武器，難怪古生嘅反應會拎嚟被人比較！唔知之後聲夢開show，古生會唔會去睇？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！