【#週末好去處】全新東岸公園主題區(第一期)正式開放 佔地近萬平方米+巨型打卡裝置+毛孩友善 ============= 想chill住咁喺海邊打卡影靚相唔一定要去離島,而家去炮台山就得,事關全新東岸公園主題區(第一期)已經正式開放喇!全新嘅海濱空間唔單止佔地9,800平方米,最正係現場設有全港第一條正式開放、全長100米嘅防波堤,可以一覽無遺絕美嘅維港靚景,仲可以同巨型得獎裝置《香港之光》盡情打卡,無論日頭定夜晚嚟都別有一番風味~ 主題區內仲有大遍草地同遊樂設施,無論同另一半、閨蜜定一家大細嚟野度過休閒時光,一邊野餐、一邊欣賞日落,諗起都覺得浪漫同Relax呀!而且東岸公園主題區仲係24小時寵物友善地帶,啱晒奴才們帶主子嚟盡情放電!由即日起至10月2日,現場仲會展出多個本地環保時裝品牌所設計嘅精彩作品,大家又點可以錯過呢~一於趁今個長週末去東岸公園主題區體驗維港風光啦! 東岸公園主題區(第一期) 地點:屈臣道以西(從炮台山地鐵站步行約7分鐘即可到達) 開放時間:24小時開放 #假期速遞 #東岸公園主題區 #海濱空間 #海堤遊樂場 #香港之光 #香港好去處