【疫情下的醫食住行】之九十六 「燒鴨雙菇瓜粒湯」 盧偉國 2022-8-7 本港新增 Omicron 仍處於4千多宗一日,數天前曾超過5千,但可能仍未到高峰。鑑於個別幼兒染疫情況嚴重,本港六個月大至三歲幼童從星期四起已可接種科興疫苗,不過預約情況未如理想,政府專家希望兒科及家庭醫生多加解説,釋除家長疑慮。 天氣炎熱,適宜多食瓜果,我今日就介紹一味「燒鴨雙菇瓜粒湯」。家庭式嘅冬瓜粒湯簡單易做,我就推薦大家加啲燒鴨粒落去,食味更為豐富。冬瓜與鴨,又的確特別配合嘅。呢味湯水清鮮消暑,老少咸宜,亦可用嚟淘飯,即成「瓜粒湯飯」。夏日炎炎,冇乜胃口,湯飯啱食! 材料:冬瓜、燒鴨、脢頭豬肉、冬菇、鮮草菇、鹽、糖、生抽、生粉、油、清水。 製法: (1) 冬瓜、燒鴨、脢頭豬肉、冬菇,全部切粒。鮮草菇,每隻切開4塊。豬肉粒用糖、生抽、生粉、油醃一陣。 (2) 用湯煲煮沸清水,落豬肉粒及冬菇,煲一陣至出味。放入冬瓜粒滾腍,然後加燒鴨粒及草菇,用鹽糖調味,yummy yummy! 有專家話疫情喺冬天有機會再趨嚴峻,加上疫苗產生抗體需時,所以家長應該把握時間為幼童接種,希望短期內有五至六成相關年齡層嘅兒童接種疫苗。教育局亦宣布鑑於疫情最新發展,全港學校下學年維持半天面授課,以及每天快測安排,直至另行通知。