孫穎生日　劉詩昆「人生火車論」冧女友

「鋼琴公主」孫穎舉辦四十歲生日派對，她與「鋼琴大師」男友劉詩昆手拖手現身餐廳。戴上兩隻鑽戒、鑽石錶及鑽石頸鏈的她，透露手上的六卡多方型巨鑽戒及鑲嵌二百多顆D級鑽石的腕錶，都是由男友所贈。她表示本月15日是她的正日生日，當天與男友二人世界，而今天則相約了一班同是天蠍座的朋友一同慶祝生日。她笑言：「都係搵個理由搵埋香港啲朋友聚吓，今日大概請咗25人，不過籌備得都好匆忙。等我哋喺御龍山嘅私人藝術館可以見人，以後啲活動就可以喺嗰度搞。」

唔使送特別禮物

劉詩昆表示雖然女友的生日已過了一星期，但今天還有其他朋友生日，一同慶祝，故非常高興。問他送了甚麼禮物給女友？他說：「我們兩個人不需要送特別的禮物，今天的派對我們一起籌備，我親手寫了朋友的名牌。我們兩人做事親力親為，做到最好。」孫穎續說：「除咗有靚嘅食物同酒，我哋都想有啲心意畀到朋友，個名牌可以畀佢哋留為紀念。」

唔使結婚？劉詩昆火車喻人生

劉詩昆坦言與女友心靈相通，無論做法、計劃、打算都一樣，就例如選名牌的卡紙，二人都選擇了相同款式。問到劉詩昆會否今年娶女友？他說：「我一定會跟她永遠在一起，人生以火車來比喻的話，我跟孫穎是最後一卡，或者也可以說是人生真正的第一站。過去的站，今天過來，已不值得回憶。感謝上帝給最後是美好、永遠的。」

靈魂伴侶超越婚姻

在旁的孫穎即冧爆說：「好sweet！」問到劉詩昆會否今晚驚喜求婚？孫穎即為男友擋駕說：「我哋已經係靈魂伴侶，超越咗求婚同結婚。我哋開咗幼兒園，成日對小朋友，覺得一紙婚書就好似幼兒園咁。劉老師佢睇嘢咁有智慧，我覺得佢可以活到150歲，所以要多啲保障老師，做啲對佢好嘅嘢。」劉詩昆亦風騷地說：「跟她在一起之後，我無論外貌及心境都年青了，以前蒼老些。」

遇男友係最完美

孫穎指剛才男友的「人生火車論」很精彩，但對方從前亦跟她說過另一個令她印象深刻的精彩言論。她說：「佢同我講之前都係綵排，真正show time係老師出現。冇好嘅綵排，真正嘅表演就唔會咁好。（依家係good show？）完美嘅show，可遇不可求，超過心想事成好多倍。」

麥明詩真係想做特首？

而問到孫穎是否邀請了港姐麥明詩出席生日會？她坦言認識麥明詩及對方的男友林作，她表示：「之前佢家人話一齊過嚟，但因為依家多人（記者）知，唔知佢嚟唔嚟，未見到佢。我好欣賞佢，上次同佢傾咗好耐，佢識音樂、唱歌，而且目標係選特首。所以無論佢今日嚟唔嚟，我都準備咗本小說《特首小姐你好》，諗住送畀佢。（有冇同佢交流音樂方面？）有，傾得好開心，希望佢將來幾成功都好，唔好放棄音樂。」