劉穎鏇被爆與胡㻗車廂約會斷正 重溫娛圈經典「車震」事件

16年港姐亞軍及「最上鏡小姐」劉穎鏇（Tiffany），加入無綫後即被力捧，參與主持人氣節目《學是學非》做「是非精」。早前更憑《3日2夜》中大騷fit爆身形及爽朗性格，成功攻陷宅男心，升呢做女神。不過今日就被爆出女神已被私有化，Tiffany暗撻胡㻗幾個月，前晚被傳媒影到佢同胡㻗密會，仲喺車廂內疑似摸黑親熱，被發現「車震」後佢哋仲火速揸車離開。

其實過去都有其他藝人發生「車震」事件，今日就同大家數一數！

楊怡、羅仲謙

喺12年，楊怡同羅仲謙仲拍緊拖嘅時候，佢哋就被影到喺羅仲謙接出席完聚會嘅楊怡，佢哋由將軍澳返屋企嘅車程內，楊怡全程伏喺羅仲謙腿間，動作仲超級奇怪。當記者走去影相嘅時候，楊怡全程都唔肯抬起頭，而羅仲謙就露出慌張嘅神色。楊怡整理儀容後，一面尷尬兼不時心虛抹嘴。

梁榮忠、朱慧敏

呢件事發生喺05年，當時梁榮忠喺仲同鍾麗淇相戀8年嘅情況下，男方被傳媒影到同朱慧敏喺車上煙韌，成為經典「車震」事件。梁榮忠之後事業一落千丈，更被封為「世紀賤男」，而唔知梁榮忠有女朋友嘅朱慧敏同樣形象跌至谷底。

林師傑

憑《愛．回家》角色「木偶哥」成功入屋嘅林師傑，14年與鄧穎芝相戀，但有指拍拖期間林師傑同o靚模Gwen半夜去咗荒山野嶺車震。鄧穎芝撞破後，即刻同男方分手。

文頌嫻

文頌嫻一向俾人感覺係乖乖女同埋純情低調，08年嘅時候，佢就被拍到同男友喺車上激咀，足足纏綿咗近20分鐘，最後更同車震男主角拉埋天窗！