劉詩昆與太太孫穎於2月抱着兩個月大的貝貝由美國回港，夫妻二人日前接受車淑梅的「父親節」訪問。老來得女，父母當正貝貝小公主看待，劉詩昆非常感謝太太：「我不會抱孩子，她辛苦了，上個月母親節我特別為她煲了一個羅宋湯，那是我唯一識煲的湯，當年我在俄羅斯留學的時候學會的！我非常開心，我這個年紀老來得女，大仔56歲、二仔25歲、貝貝比兩個哥哥更漂亮，沒有皺紋，漂亮得超出我的承受範圍，只要一離開家，我便開始想念貝貝了。」

孫頴則話自己一直係一個唔想結婚嘅人，但喺2011年同劉詩昆老師帶着300個小朋友去維也納表演一起解決咗好多難題，諗到想要小朋友，就決定喺拉斯維加斯簽紙註冊：「我哋相距36年，完全唔係問題，老師內心非常年青。去年初我哋知道懷孕，好開心又好擔心，當時我哋喺紐約，疫情非常嚴峻，冇通知其他人，將更多思想放喺安全方面。我係順產嘅，老師因疫情唔能夠入產房，我聽到貝貝第一聲哭聲響徹雲霄，我嘅眼淚就飆出嚟！」孫穎指自己佗B唔算辛苦：「千百次想像佢係點樣，終於出嚟喇，呢個亦都係我哋長遠以來一個美麗嘅約會，終於見到了！」

孫穎同劉詩昆都冇擔心過年紀大嘅問題：「每對父母無論乜嘢年紀都會面對『明天同意外』，唔知道哪一個會先來，只要做好當下！」劉詩昆接着說：「我最期望貝貝兩歲就要開始彈鋼琴，我有信心貝貝好聰明，智商超前，她的手很大，聽音樂手舞足蹈，音樂感知力非常強！我覺得82歲再做爹哋好自然，和我當年20多歲、40多歲做爹哋的感覺差不多，如果未來貝貝的樣子像全智賢，這也是我能夠接受的，哈……其實我最希望貝貝長大之後知道我好愛她，非常愛她……。」劉老師講到眼紅紅，孫穎爆劉詩昆是「女兒控」的趣事，說有次朋友到訪，見到老師不時踱步行出行入，原來他掛著貝貝，一小時內入房6次偷望熟睡中女兒。劉詩昆緊張女兒，聘請兩名工人姐姐，專責協助太太輪流照顧貝貝起居生活。

太太孫穎指貝貝而家已經强烈感覺到父親嘅愛：「我同大師都喺度諗，一個獨生女會唔會太孤單？能夠多生兩個弟弟就最理想，我哋而家開始商量，一切順其自然。我希望同貝貝共同前行，快樂滿足地行走人生每一步，我們齊心合力咁將佢撫養成人，悉心、呵護、守護同照顧，希望佢活出羅曼羅蘭那一句：就算即使看清楚生活的真相，依然熱愛生命！不過而家忙緊老師嘅自傳，中文版今年可以出版，英文版就搵緊國際級嘅翻譯。自傳電影方面因有好多角色人選未定。」

疫情下，父親節會在家慶祝，孫穎會邀請幾位好朋友跟子女到家中開小型派對：「劉老師話一路以嚟有貝貝陪佢寫自傳，已經幸福到不得了，其實我哋下周六（26日）將一家人到西九龍文化中心，到時我哋全家出動，我哋表演，貝貝會上台獻花。」