劉慧卿︰最尊重選民決定 如市民贊成暴力 出現暴力議員亦不出奇

立法會議員、民主黨主席劉慧卿今早出席DBC數碼電台節目《早晨八達通》，談論新界東補選、高鐵會議佔領主席台、版權條例修訂案等議題。

《明報》報導劉慧卿於節目中指民主黨不怕9月的立法會選舉被本土派「鎅票」，並引述一句「鎅咩票，啲票喺我度，我相信大部分人都反對暴力」，引起網絡熱議。

（更新︰《明報》已更正報導，並向民主黨、劉慧卿及讀者致歉。）

學民思潮召集人黃之鋒在Facebook轉貼新聞時，把上句跟於補選勝出的楊岳橋言論比較，認為兩者「差天共地」，並指「民主黨搞成咁真係有原因」。

本土民主前線亦重貼其候選人梁天琦的訪問，回應劉慧卿︰

翻聽DBC的電台節目錄音，可發現劉慧卿未有提到「鎅咩票，啲票喺我度，我相信大部分人都反對暴力」——至少不是「我有民意支持」的意思。在該節目8時半至9時的環節中，劉強調尊重選民決定，假若提出激烈／暴力抗爭路線的人能選入議會，那是選民的選擇。

引起爭議的一句，其實由兩段說話組成。首先，劉慧卿指「我從來無講『鎅票』，鎅咩啫？嗰票喺我手，我投畀邊個關你乜事啫？」，意思是選民有權選擇投給哪位候選人，而非指「選票都屬於民主黨」。

而「我相信大部分人都反對暴力」這半句，節目中並非緊接上句，而是在大約兩分鐘後出現。在該段中劉慧卿表示，如果她（相信大部份市民不贊同暴力）是錯的，那麼有支持暴力的議員進入議會不出為奇。

換言之，《明報》引述那句應是把劉慧卿的說話「移花接木」所致，並非其原意。以下三段文字來自DBC節目8時半至9時環節劉的發言，供讀者參考，讀者亦可按連結前往收聽節目（須先申請免費帳戶）。

約6分03秒開始︰

我最尊重、最尊敬就係選民嘅決定，而我哋香港雖然無民主，連緬甸都不如，但都仍然喺立法會呢三十幾席嗰度呢俾人自由去參選。你攞到100個提名你就去，咁無人要改呢個制度啦，咁你姓陳姓黃姓乜，你有本事你咪去選囉。咁我都話喇，上一屆我哋9個議席有19條隊，咁你走嚟新東你搞48條隊吖笨。無緊要架，你要選，而又有人選到你喎，咁去投票嗰啲人…所以我從來無講「鎅票」，鎅咩啫？嗰票喺我手，我投畀邊個關你乜事啫？咁所以佢又投到喎，又按呢個制度，係最高票嗰9位喎，佢入到去，咁咪祝香港好運囉。

約7分11秒開始︰

嗱一，我唔會鬧去參選啲人啦，因為你合法吖嘛。我更加唔會鬧選佢入去嗰啲選民，咁我嘈咩啫？我有乜好講啫。咁你入到去你鍾意搞咩，議事規則容許你你咪做囉，唔容許嘅，你做，咁如果個主席係要趕你嘅，或者要懲罰你又得，咁規矩就喺咗度架喇，有乜辦法呢？

約7分55秒開始︰

因為我頭先講呢，我係相信大部份嘅香港市民係唔贊成暴力嘅。咁如果我係錯嘅，原來有好多係贊成，每一個區都夠票，唔好講一個吖，選兩個入去嘅，咁我就話「啊原來香港好贊成暴力」。咁如果贊成暴力，有暴力嘅議員入到去唔出奇架喎，有咁嘅選民就有咁嘅議員囉，係有咁嘅市場佢咪出嚟試吓囉。

• 反駁梁天琦　劉慧卿：得6萬票點三分天下？（明報）
• 黃之鋒引楊岳橋言論駁劉慧卿：差天共地（明報）
• 早晨八達通 2016-03-01（DBC數碼電台）