靚女股評 唔係得個樣
繼上次陸叔請來一班老餅男股評後，今次就請咗三位擁有CFA（特許財務分析師）專業資格的女股評，李韻儀（Sonija）、李惠嫻（Hannah）及陳鳳珠（Ellie），一起暢談為何在行業競爭大、人才濟濟的情況下仍依然選擇入行。
股評人難做，擁有CFA資格的女股評人更是難求，今次陸叔邀請了李韻儀（左）、李惠嫻及陳鳳珠（右）作嘉賓，分享其入行及上鏡講股的經驗。
陸：點解當初妳哋會選擇做呢行？
珠：我本身大學係讀工商管理，一畢業就已經想搵相關嘅工作，○八年就入咗現稱西證國際證券（0812）嘅敦沛做分析員，有日我上司郭家耀問我可唔可以幫手，分擔上電視「講股」嘅工作，嗰時見有咁嘅機會咪試吓囉，就係咁做到o依家喇。
儀：我同Ellie一樣，大學時期都係讀工商管理，不過畢業後我做其他嘢先，去到○八年先加入時富（0510）做分析員，記得我上電視係喺○九年去now財經台，因為要頂替病咗嘅拍檔，嗰次仲係我第一次對住cam（攝影機）「講股」，諗番起真係好驚o架。
嫻：我同妳哋兩位有啲唔同，我大學係讀新聞系，畢業前仲係好迷茫，唔知想做咩工，一畢業就去咗間細公司做marketing，大概做咗一個月到，就轉去《經濟日報》投資版做。我無財經知識底，開頭都做得好辛苦吓，惟有不斷睇書去惡補，要好似海綿咁去吸收新嘢，你知啦，財經記者寫投資分析，係要有基本概金融知識，因為咁我走去讀CFA。
陸：Hannah，妳幾時入我哋呢行？
嫻：因為財經記者唔會計落CFA個基本要求到，所以我轉咗去耀才（1428）做分析員，無耐佢哋搞咗個財經台，正因為咁我就第一次上鏡「講股」。
陸：我諗你哋都唔會驚上鏡，同埋有咩魔力令妳哋繼續做落去呢？
珠：陸叔，當初我上鏡真係好驚o架，又怕做得唔好畀人批評，做耐咗就明白到我點做都好，背後總會有人話，所以抱住一個信念，我要不時檢討同改善自己嘅不足，凡事過到自己嗰關盡力去做就得喇。
嫻：陸叔，我就上親鏡都會驚，有段時間驚到要走去做番幕後，好似初頭我返舊公司新鴻基咁，都只係要我喺背後寫嘢，但過咗無耐公司重組條team，又要我返出嚟做番幕前。
儀：哈哈，講出嚟，陸叔你哋可能會笑我，我上鏡做股評人嘅原因，係希望話到畀觀眾知咩叫好嘅投資，更可能由於我有種使命感，所以我會繼續做落去囉。
CFA資格好有用
陸：有CFA呢個資格對妳哋份工有咩幫助？你哋請人又會否同樣要求CFA呢個入職條件？
珠：CFA話晒都係專業資格，我覺得對提高自己嘅競爭力有一定幫助，不過近年啲人學歷愈嚟愈高，要應徵做senior嘅位，CFA似乎只係一張入場券，呢個資格我覺得係一個「must」，o依家請人反而比較着重內涵，我會睇同佢哋傾偈時嘅感覺，亦睇佢哋對行業範疇有幾了解。
儀：CFA可以refresh我嘅記憶，對我嚟講幾有用，因為當我做in-depth analysis嗰陣，可能會遇到一啲tricky位，喺CFA學過嘅skills可以幫我應付呢啲陷阱。我唔同Ellie，我覺得CFA係一個「plus」，因為一個人肯用咁多錢、同時間去考呢個專業資格，證明佢係有心想做呢行，亦都有心想喺呢行發展落去。
嫻：哈哈，我同意Sonija嘅睇法，就算佢只係考到level 1，或者level 2，我都已經覺得佢好有心囉，因為一邊返工一邊讀書，真係好睇決心亦好辛苦o架。
陸：咁妳哋o依家啲公司會唔會介意你哋成日上節目做唔晒公司啲嘢？
儀：我公司唔係太支持我成日上節目，因為新加坡總公司嗰邊無股評人呢個概念，但公司都通情達理嘅，只要我兼顧到公司嘅工作就無問題。佢哋都知我累積咗咁多年，先可以儲起今日嘅成就，一停落嚟就要重頭再開始過。
珠：喺部門入面有同事會幫我分擔工作，加上佢哋都唔太鍾意上鏡，做節目呢個角色就多數由我做番。我同Sonija一樣，只要平衡到工作同做節目就OK喇。
嫻：公司平時要求做嘅我一定搞掂晒，做節目呢樣嘢係我自己嘅事，不過公司比我嘅自由度都好大，我嘅工作量都好合理，但如果上節目多咗，我會OT搞掂番啲未做嘅工作，同Ellie、Sonija一樣，最重要係平衡到做嘢同做節目就得喇。
陸：哈哈，我都好贊同你哋要平衡工作同生活嘅態度，亦睇到你哋好肯學嘢同每事問，我認為生命同生活取得平衡，做起事上嚟就事半功倍，時下年輕人好應該同你哋借鏡。（待續）
