【明報專訊】噚日公布嘅《2023年施政報告》提出將僱員再培訓津貼嘅每月限額由5800元加碼近四成，去到8000元。再培訓局明年第一季會試行畀僱主以「包班」形式提供職前培訓，為期兩年，首階段集中人力嚴重短缺嘅行業，例如健康護理、飲食、零售、酒店服務等，為僱員提供再培訓津貼、培訓後不少於一年嘅僱傭合約、高於市價水平嘅薪酬，以及為期6個月嘅就業跟進服務同進修培訓安排。
政府又會推出為期3年嘅「再就業津貼試行計劃」，對象為連續3個月或以上無從事任何獲酬工作嘅40歲或以上中高齡人士。如果佢哋連續工作半年，就可以攞到最高1萬元津貼，連續工作1年就可再攞多1萬元津貼，政府話希望增加呢班中高齡者重投工作嘅誘因，預計惠及6000人。
相關字詞﹕僱員再培訓津貼
