六合彩

六合彩（粵拼：luk6 hap6 coi2；英文：Mark Six）係香港唯一嘅合法彩票，係少數獲香港政府准許合法進行嘅賭博之一。

為咗加強打擊民間嘅字花賭博，並防止賭博資金流向黑社會等非法集團，香港政府從1975年起開售彩票，取代原先嘅馬票。負責開彩嘅係法定機構香港獎券管理局，由香港賽馬會以「香港馬會獎券有限公司」嘅名義代理接受投注。投注彩池除咗用嚟做派彩之外，餘額撥交社會福利署獎券基金用作慈善用途。最初嘅彩票係14揀6，每個禮拜攪珠開彩。為迎合大眾「以小博大」嘅心理，1976年大幅增加中彩難度及派彩，改變開彩方法為36揀6（及一個特別號碼），正式名為「六合彩」，並將開彩次數增加為每個禮拜兩次（後來更增至每個禮拜3次）。之後為維持派彩數額及增加中獎難度，曾經多次增加選擇數目。正如其他賭博模式一樣，六合彩嘅中彩回報必定遠低於成本。

投注方法

投注

六合彩每注港幣10蚊（$5半注），有以下投注方法：

每注單式投注，從設定數字中揀出6個數字。
「複式」投注：揀出超過6個數字，中獎機會同投注金額需要計算出全部可能嘅6個數字組合。
「膽拖」投注：揀出超過6個數字，其中一個或以上作為「膽」。中獎機會同投注金額需要從所揀數字中計算出全部可能嘅6個數字組合，但每個組合中必須包括作「膽」嘅數字。

自2006年嘅端午金多寶開始，馬會會響金多寶攪珠前一個禮拜，預售金多寶攪珠彩票。除非下期攪珠係金多寶攪珠，否則投注人士應喺彩票上填寫金多寶選項，或者買飛嗰時向職員講明。

開彩

開彩時以自動機械攪珠，從設定數字彩球中抽出六個中獎號碼同一個特別號碼。過程由電視台註明「現場直播」。

派彩

先從投注彩池中派出所有四至七獎，然後再扣出金多寶累積。剩餘彩池按 45%:15%:40% 比例分成頭、二、三獎彩池，畀中獎人平分。如果頭、或二、三獎無人中，彩池會撥入累積彩池。一般嚟講，頭獎彩池包括之前嘅累積多寶；如果呢期屬金多寶搞珠，累積多寶會計算入金多寶當中（舉例：若果累積多寶少過金多寶，頭獎彩池嘅多寶仍然係原定金多寶數額；如果累積多寶多過金多寶，頭獎彩池嘅多寶會等同多寶個數）。喺以上情況下，任何剩餘嘅多寶會撥入金多寶基金。

獎	對中組合	派彩	中獎機會
頭獎	6個數字	每注均分頭獎彩池：投注彩池派出四至七獎及金多寶後嘅45%，加任何累積彩池，或同時包括金多寶，每期頭獎獎金最少派港幣$8,000,000	${\frac {1}{49 \choose 6}}={\frac {1}{13,983,816}}$
二獎	5個數字 + 特別號碼	每注均分二獎彩池：投注彩池派出四至七獎及金多寶後嘅15%，每注最少派港幣 $38,400	${\frac {6 \choose 5}{49 \choose 6}}={\frac {1}{2,330,636}}$
三獎	5個數字	每注均分三獎彩池：投注彩池派出四至七獎及金多寶後嘅40%，每注最少派港幣 $19,200	${\frac {{6 \choose 5}{42 \choose 1}}{49 \choose 6}}\approx {\frac {1}{55,491.3}}$
四獎	4個數字 + 特別號碼	每注派港幣 $9,600	${\frac {{6 \choose 4}{42 \choose 1}}{49 \choose 6}}\approx {\frac {1}{22,196.5}}$
五獎	4個數字	每注派港幣 $640	${\frac {{6 \choose 4}{42 \choose 2}}{49 \choose 6}}\approx {\frac {1}{1,082.76}}$
六獎	3個數字 + 特別號碼	每注派港幣 $320	${\frac {{6 \choose 3}{42 \choose 2}}{49 \choose 6}}\approx {\frac {1}{812.07}}$
七獎	3個數字	每注派港幣 $40	${\frac {{6 \choose 3}{42 \choose 3}}{49 \choose 6}}\approx {\frac {1}{60.905}}$

每注單式投注，或複式、胆拖中獎組合只可以中獎一次。

而根據六合彩獎券規例3.16有關獎金基金會喺必要時重新分配：

若果四獎、五獎、六獎及七獎獎金加埋總額超過獎金基金60%，將由金多寶彩池撥支畀四獎、五獎、六獎及七獎獎金所款項之餘額。
若果獎金基金60%嘅款額，加上金多寶彩池現存總額，仍然派唔晒全部四獎、五獎、六獎及七獎獎金款額，四獎、五獎、六獎及七獎嘅所有獎金將同時按比例調低。而四獎獎金要係五獎獎金嘅15倍，五獎獎金要係六獎獎金嘅2倍，六獎獎金要係七獎獎金嘅8倍。之後，每一獎金必須調低至同注項單位最接近嘅整數倍數。
若果獎金基金扣除金多寶扣數及支付四獎、五獎、六獎及七獎獎金後，其餘額唔夠派頭獎、二獎及三獎獎金嘅最低款額，差額部份將由金多寶彩池撥支。而頭獎、二獎及三獎獎金應調低至同注項單位最接近嘅整數倍數。
若果獎金基金及金多寶彩池扣除預計派出四獎、五獎、六獎及七獎獎金所需嘅錢之後，唔夠派出頭獎、二獎及三獎獎金嘅最低款額，所有獎金會同時按比例調低。而頭獎獎金要係二獎獎金嘅兩倍，二獎獎金要係三獎獎金嘅2倍，三獎獎金要係四獎獎金嘅2倍，四獎獎金要係五獎獎生嘅15倍，五獎獎金要係六獎獎金嘅兩倍，六獎獎金要係七獎獎金嘅8倍。如有必要，所有獎金都應調低至同注項單位最接近嘅整數倍數，任何因此而產生嘅餘款會撥返金多寶彩池。

演變

1976年訂立以36揀6嘅六合彩
1983年由36個數字增加至40個
1988年增加至42個數字
1990年增加至45個數字
1992年增設頭獎累積獎金港幣3,800萬元上限
1995年固定獎金提高兩成，頭獎獎金保證增至500萬
1996年增加至47個數字
2000年廢除啡色同橙色號碼球，得番紅、綠、藍三隻色
2002年增加至49個數字，增設七獎，並取消頭獎累積獎金上限
2010年 11月9號固定獎金提高一倍，頭獎獎金保證增至800萬，每注金額提高一倍至10蚊

早期嘅六合彩每個禮拜攪珠兩次，其後響某年暑假試驗星期六進行攪珠，如今每逢星期二、四及六或日舉行六合彩攪珠

領獎

用現金投注：

喺攪珠當日起計60日內領獎

中獎少過100萬（包括四獎至七獎）：可以喺各場外投注處或馬場領獎；
中獎多過100萬：須前往跑馬地體育道一號馬會總部領獎；
中獎多過500萬嘅頭或二獎：須於攪珠後60日內，致電1817登記。

用投注戶口投注（六合彩固定投注指示例外）

中獎少過500萬：自動派彩
中獎多過500萬嘅頭或二獎：須於攪珠後60日內，致電1817登記；為提供更佳顧客服務，馬會顧客服務部會於攪珠後第二日，根據投注戶口持有人填報嘅資料，聯絡中獎者登記，但中獎者亦應主動登記。

用投注戶口「六合彩固定投注指示」投注：

無論中獎金額幾多，都會獲自動派彩。

派彩紀錄

最高嘅頭獎派彩紀錄，出現喺2013年12月10號，一注獨得港幣90,951,590元頭獎。
最低嘅頭獎派彩紀錄，出現喺2001年10月30號，共28注中，每注派大概港幣18萬^[1]。嗰期攪珠號碼為12、18、22、28、32、38，特別號碼29。
最多人中頭獎嘅紀錄，出現在1997年7月5號香港回歸金多寶攪珠，共39注中，每注派港幣70幾萬。嗰期攪珠號碼係1、4、7、9、17、18，特別號碼40。

攪珠

六合彩攪珠由1976年7月到1997年6月、2001年7月到2015年7月，都係由亞洲電視（同佢前身麗的電視）負責直播；而1997年7月到2001年6月同埋2015年8月開始，就由無綫電視負責直播。

曾經做過六合彩攪珠主持人包括：

亞視版本

無綫版本（1997年-2001年）

無綫版本（2015年開始）

蔡運華（非無綫藝員）
陳思琦（非無綫藝員）
范文雅
吳珮如
蔡國威
李芷晴
黃曉明
羅雪妍

音樂

響六合彩攪緊珠嗰陣會播出背景音樂，係拎自荷蘭樂隊Shocking Blue嘅Inkpot；而響1997年到2001年之間響TVB播放嘅背景音樂係出自英國Dave Hewson所寫嘅Blazing Colours。

減緩賭博危害

為咗減緩因賭博帶嚟嘅個人、家庭同社會問題，香港政府規定，響香港賽馬會嘅六合彩投注場所同網站上都必須展示有關戒賭熱線(+852)183-4633同輔導及治療中心（例如錫安社會服務處- 勗勵軒、明愛展晴中心、東華三院平和坊）嘅資料。香港賽馬會提倡「有節制博彩」，認為博彩只可以作為社交消遣嘅娛樂，並撥款畀政府成立嘅平和基金，協助沉迷賭博嘅問題賭徒戒賭。香港賽馬會同時嚴禁未滿18歲人士參與博彩活動。

地下六合彩

雖然六合彩喺香港係合法彩票，但香港政府同香港賽馬會既從未試過喺香港以外地區搞過投注業務，又冇委托過或授權畀任何人或組織搞過相關業務。喺中國大陸，冚唪唥有「香港六合彩」、「香港賽馬會」、「香港馬會」或類似名搞六合彩活動都屬虛假業務。另外，香港賽馬會嘅官網喺中國大陸，除咗四、五星級嘅涉外酒店同境外人士居住區之外都入唔到（普通用戶要擒墻出去睇）。所以中國大陸入到去六合彩啲網都係流嘢。

中國大陸嘅假六合彩網都加咗好多香港六合彩未出現過嘅「估十二生肖」、「包波」呢啲嘢，重攞住香港賽馬會嘅名做出宣傳單張、報紙、冊仔同假嘅香港電話冧都有，甚至有網站黐莫須有嘅「委託證書」、「戒賭熱線」嚟整蠱啲人。實際上，正式嘅香港賽馬會喺六合彩宣傳方面，話啲錢係點用喺慈善，絕對唔會主動招攬生意。由於呢啲六合彩冇王管，所以投注資金轉到背後控制嘅非法集團、黑社會入面。另外，由於中國大陸冇乜戒除賭癮嘅組織，所以流嘅六合彩出現咗嚴重嘅社會問題。喺中國大陸，凡係涉及「香港六合彩」嘅服務都係違法行為。

喺1980年代，由於廣東地區用魚骨天線收到香港嘅電視台，所以六合彩最先喺廣東出現，之後傳到廣西、湖南、福建、江西地區，後嚟喺廣東做嘢啲浙江商人又將佢帶到浙江一帶之後傳到成個中國大陸。雖然中國大陸政府一直猛咁打擊地下六合彩行為，但重未剷除嗮同地下六合彩有關嘅活動。

註

↑ 〈存档副本〉. 原著喺2009年2月22號歸檔. 喺2009年10月24號搵到.

睇埋

出面網頁

[1] 〈存档副本〉. 原著喺2009年2月22號歸檔. 喺2009年10月24號搵到.

[1]