追債新招：呃畀料扮尋親　匿名信誘現身

財務公司收數手法層出不窮！近期有財務公司為追尋債仔下落，出動「軟功」，貼出疑似家人尋親啟事大橫額，更以薄酬利誘，令人誤以為有人尋找親人而主動提供債仔消息；亦有公司寄匿名信件予債仔，訛稱有重要事情商討，藉此誘債仔主動現身。立法會議員已接獲多宗同類投訴，建議收件者報警，由警方跟進。

傳統淋紅油、寫大字報、膠水注入門鎖等迫使債仔現身的強硬手段，因警方嚴厲打擊，開始變招出擊。元朗公屋朗屏邨一帶，近月出現大型尋人橫額，引起區內居民關注。橫額印有1名中年女子相片，寫上「此人與母親弟弟住在朗屏邨xx樓xxxx室，無故失蹤，了(杳)無音訊(音信)，希望各界提供消息。」製作橫額者亦留有聯絡電話，並指會向提供消息者給予薄酬。

「梗係個女離家出走，之後唔返屋企失咗蹤，屋企人要搵佢啦。」不少街坊都欲幫手尋人，「見到呢個女人出沒會打去通知下，幫得人就幫啦。」期間有街坊根據橫額電話致電了解，言談間卻揭發對方竟然是財務公司尋找債仔。「好彩我都畀唔到咩消息佢，如果唔係自己無端端幫人搵債仔！」

記者根據橫額的住址資料，到該單位了解。屋內1名女士表示，橫額中人是其女兒，「我同個女無聯絡十幾年，佢依家都30幾歲啦，我都理唔到。」但對有人製作橫額感到愕然，「唔係我哋整，我都唔知邊個整幅尋人橫額。」

她懷疑事件曾與早前有收數公司上門有關。「之前有收數公司上門，話我個女欠債，可能橫額係收數公司整啩？不過我真係唔知佢去咗邊。」該區區議員鄺俊宇亦有留意該個尋人橫額，初時以為是邨內有人失蹤，「我都以為係尋親啟示，真係估佢唔到。」

除假扮家屬尋找親人外，收數公司透過引蛇出洞方式尋找債仔。近月有不少住戶在社交網站上載相片，表示收到1張寄到其家的郵件，信封並無寫上收件人姓名，該住戶打開信件後，信內寫上「見字即覆，急事，勿誤！」內容則是指寄件人要與收件人聯絡處理1項重要事務，要求收件人致電了解詳情，並指為閣下利益着想，透過核實，澄清及了解有關事務，可消除不必要的誤會。

「我拆開封信至睇到，收件人都唔係我，又無回郵地址，想打回頭都唔得。」1名居於劏房的住戶曾致電有關電話，接聽者指其家有人欠債，要他即時還錢。」他澄清自己並無借貸，對方卻不理會，更指會有進一步行動，他大驚即時收線，懷疑是上手租客曾向財務公司借錢，隨後搬走，收數公司聯絡不到債仔，最終透過信件引債仔現身。記者曾致電有關電話，但電話已經沒有服務。

私家偵探張大偉表示，張貼尋親啟示或寄信要求回覆等手法，屬收數公司尋找欠債者的新興手法：「呢個方法都幾有效，但提供資料的人如果覺得畀財務公司利用，走去投訴，會影響公司聲譽，所以一般大公司都唔會用，只有缺乏監管嘅財務公司才會使用。」

立法會議員麥美娟指出，近日有街坊收到不明來歷的信函，要求收件人致電回覆，她提醒居民切勿回覆，以免遭不法人士套取個人資料，建議市民應向警署報案或備案，她亦已將事件反映給保安局官員，希望執法部門跟進調查。