陳國邦上ViuTV激嬲無綫 老婆羅敏莊撐：最需要是尊嚴
TVB一台獨大從來不是秘密，喺香港只有TVB會不停開戲，其他電視台又唔爭氣，想拍劇竟要入TVB。不過耍tvb睇中你力捧又要分級數，簽埋經理人合約嘅「親生仔」，有工作自然優先有份，簽普通藝員又或者自由身嘅就要等運到。但自由身原來唔等於可以做乜都得。最近傳出陳國邦因為幫ViuTV及奇妙拍攝節目及宣傳，引來TVB高層不滿，即使一早度期兼試造型，都要飛起陳國邦，羅敏莊都力撐老公話：「其實我們最需要的就是尊嚴！」
2015年陳國邦即將約滿之際，曾經於網上寫公開信鬧爆無綫，離巢兩個月後，又返大台拍處境劇。之前拍攝《大太監》及《公公出宮》，陳國邦同黃浩然、黎耀祥、曹永廉及蕭正楠等合稱「太監5虎」。點知最近有報導話，TVB開拍旅遊節目《公公出埠》，得4虎而未見陳國邦身影，已經令人懷疑。原來連一早試晒造型嘅新《包青天》，公孫策一角都話唔使陳國邦再飾演，原因竟然因為佢幫ViuTV做宣傳。
陳國邦近年回復自由身，曾經先後幫奇妙電視以及ViuTV工作，情況就好似宣萱、林文龍拍《不懂撒嬌的女人》咁，自由身就係去邊都得啦，工作根據合約，完成拍攝做埋宣傳就可以CLOSE FILE，點知就係陳國邦盡演員本份，幫ViuTV宣傳主演劇集，引致TVB方面不滿。陳國邦接受雜誌訪問時透露，TVB並無向佢親自交代，只係同經理人公司講，因為佢出席咗ViuTV嘅劇集宣傳，就產生換角呢件事。
雖然佢今次無再寫公開信，不過陳國邦都語重心長話，希望TVB可唔可以俾啲尊重演員，唔好呼之則來揮之則去。羅敏莊亦留言力撐老公話：「衹可無奈……他的命途總是崎嶇……其實我們最需要的就是尊嚴！」講真近兩年陳國邦都有不少工作，又拍網絡電影又做舞台劇，羅敏莊好多登台又帶人睇樓，佢地仲不時帶埋囡囡一家三口工作，東家唔打打西家，可能離開先發覺世界原來好大好美好呢。