ViuTV《全民造星III》爆姊弟戀 CY陳澤言與卡文關嘉敏拍拖搭港鐵斷正 | 蘋果日報

爆相爆片丨《全民造星III》爆姊弟戀 CY與卡文拍拖搭港鐵斷正

更新時間 (HKT): 2020.12.29 00:00

新一屆《全民造星III》大前晚圓滿落幕,不過原來ViuTV《造星》不但成功製造出姜濤和MIRROR等明星,今季已成功撮合KLAU同KIKI,似乎又有新情侶誕生。總決賽當晚公然駁評判兼ViuTV高層金廣誠嘴而搶盡節目風頭的CY(陳澤言),雖然三甲不入,但就成功暗撻《造星III》同組隊友卡文(關嘉敏),昨日分別有兩位讀者透過《蘋果》「爆相爆片」報料,指在前日目睹《造星III》CY和卡文拍拖搭港鐵,卡文一度在車廂冧爆挨落CY身,而之後二人齊逛尖沙嘴K11商場,姊弟戀斷到正!

10強之一的CY現年24歲,比起10強止步的26歲B組隊友卡文年輕兩歲,憑一股儍勁及似陳奕迅(Eason)神經刀作風而備受注意,至於卡文是女子組合Bingo出身,入行4年一直被視作花瓶,今次終憑《造星III》受注目。

讀者K小姐最先在北角港鐵站發現CY和卡文,K小姐說:「噚日(即前日27日)下午4點左右,我喺北角站上車時撞見佢哋,雖然佢哋戴住口罩,但CY一眼就認得出,而卡文着嗰對鞋我之前都見佢着過,佢哋一入車廂就行埋另一邊,我見到卡文挨咗落去CY度。」

原來CY跟卡文下一站是尖沙嘴,事關二人拍拖到K11,被另一讀者C小姐撞到正,C小姐說:「噚日大概下午4點半左右,我喺K11地庫間D-mop撞到卡文先,因為我有睇《造星III》,我都係佢follower,佢迎面行過嚟,我好肯定係佢,佢一路行一邊講電話,跟住好快行出K11去西鐵站,原來係join CY。沿途都有人望佢哋,但佢哋行得好快,亦唔見有拖手,佢哋落咗去尖東西鐵站之後,搭到去紅磡站轉車,我都係嗰個站轉車,但之後唔知佢哋去咗邊度。」根據兩位讀者提供相片,卡文所戴啡色帽,曾於其IG出現,而估計卡文與CY由北角到尖沙嘴,之後再到紅磡。

CY:大家了解緊囉

《蘋果》昨日向CY求證與卡文拍拖一事,他晚上回覆《蘋果》:「我哋唔係拍拖呀!係大家了解緊囉。」

至於卡文昨日被問到跟CY拍拖搭港鐵到尖沙嘴,卡文未有否認,只表示當日曾到尖沙嘴還衫,對於跟CY拍拖,她直認大家互有好感:「我同CY因為《全民造星III》而認識,都多咗了解,我同佢互相對大家都有好感嘅。你話發唔發展到,睇吓我哋之後點樣再溝通、點樣去了解大家啦,希望大家都可以畀啲空間我哋啦。」卡文年初曾與同公司組合BOP天堂鳥成員葉灝基(Gordon)傳緋聞,但據悉二人拍拖半年便分手收場,對此卡文表示:「我同Gordon嘅關係係同公司同事,同埋好close嘅friend,大家好傾得埋,都係好friend嘅friend囉。」

其實CY在20強和總決賽當晚,曾表示:「多謝我生命中三個好重要女人。」而前日他在IG開live時,有講到其中兩個女人是《造星III》監製花姐黃慧君和B組導師彭秀慧,未有提及第三個是誰,令人懷疑第三個女人,其實正是卡文。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner