全民造星4︱天籟之聲Ash被淘汰 網民洗版鬧爆Foul錯人

ViuTV選秀真人騷《全民造星IV》喺噚晚（24日）最新一集繼續進行第二回合淘汰賽，第三輪對戰由許廷鏗（Alfred）領軍嘅A4對梁祖堯帶領嘅B2，參賽者們都有出色嘅表現，不過繼上集靚聲Emiko被淘汰後，今集竟然連擁有天籟之聲嘅人氣選手Ash都冇得留低。

第三輪對戰先出場嘅係A4，成員包括芯駖、超酸、子涓、Win Win、So Ching及筠兒，佢哋以跳唱形式表演歌曲《Lady Killa》，導師許廷鏗原本擔心佢哋嘅唱歌能力，不過佢哋嘅表演獲得高度評價，評判們表示好鍾意，當中鍾舒漫就話覺得佢哋表演時專業，而泳兒更指：「覺得你哋可以直接出道」。

之後就到B2出場，而成員包括Liu哥、阿Mic、Ana、WINKA、Ash及鐵鐵，佢哋由組隊到表演後都相處融洽，就算鐵鐵喺練習「Dance Battle」未有跟得上進度，佢哋都會溝通及伸出援手幫忙。佢哋可以話係B組嘅唱將，所以佢哋喺台上演唱《相信一切是最好的安排》時都表現出色，不過陳輝陽似乎覺得要有舞蹈配合，所以問「係唔係需要跳埋呢？」，而喺後台嘅導師梁祖堯及監製花姐都認為呢個表演唔需要跳舞。

最後就輪到兩隊「Dance Battle」，A4嘅舞技明顯俾B2優勝，因為佢哋有唔少經驗豐富嘅舞蹈員，當中Win Win更獲韋羅莎稱讚。最後喺總括自選表演及Dance Battle後，A4獲得四盞燈勝出。而評判就需要喺落敗嘅B2組中淘汰一名參加者，阿Mic和Ash竟然各得兩票，喺評判再次投票後，Ash獲得三票慘被淘汰。梁祖堯喺評判投票時已經表明最唔想Ash被淘汰，所以佢明顯唔接受呢個結果，直指評判Foul錯人。

呢集出街後，唔少網民都戥Ash唔抵，紛紛留言表達不滿，除咗鬧爆一班評判之外，仲揚言要罷睇節目，例如「好嬲 完全唔想再睇」、「還我Ash!!!!! 垃圾評判！」、「罷睇造星4！陳輝陽你同我走！」、「造星冇ash可以唔洗再睇」、「今晚睇到好嬲好傷心 Ash你做得好好，好亮眼！真心覺得你係出眾嘅，希望日後再見到你啦！」、「Ash!!!!!!!!foul哂觀眾心水，你哋想點，搵鬼睇」、「還我ASH!!!!!!嬲到喊！」、「點會係天使之心Ash架，，真係可以熄電視了」、「Ash 係我最鍾意一個，又唱得，真係嬲到爆 佢啲teammates真係好感情，見到佢哋我都喊埋一份」、「好嬲呀，點解foul Ash? 罷睇！」及「你知唔知 呢班評判惹起公憤？撈返Ash ！」等等。

全民造星按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！