全民造星4｜20強名單誕生！眾矢之的方方、子涓決賽前止步 網民指評分準則有問題？

ViuTV選秀節目《全民造星IV》嚟到白熱化階段，噚日（16日）播出第五輪淘汰賽，由阿Jer（枊應廷）做導師嘅「Jer組」上演最後一場表演；雖然阿Jer熱心準備道具，又親自教授唱歌技巧畀組員，但組員表演卻遭判評狠批，成最低分一隊，最後Jer組方方、阿蛋、子涓及尾二嘅Dee組馬欣、Kinki被淘汰，20強名單終誕生。

Jer組成員Alice、阿Gao、子涓、方方及阿蛋表演完，花姐直言未消化到個演出，要讓畀其他評判先講評語，到返花姐嗰陣佢就直言內心好掙扎，知道佢哋個表演係想表達一啲嘢，但睇唔明：「我覺得有啲位演得過咗火，好似夾硬話你知『我係咁』！」之後仲指出自己完全唔享受佢哋表演，仲狠批佢哋唱功：「我聽到你哋啲假音位，或分開唔同層次聲音，嗰種重疊，你哋平衡唔到，令我好煩擾，唔想再睇你哋表演，同埋有樣嘢最扣分，亦令你哋唔能夠完全投入，就係你哋太忙，喺個表演入面，又要綁繩，又要轉道具，又要轉屏風，又要記走位，作為觀眾，我擔心你能唔能夠趕得及，多過投入睇你哋表演。」

淘汰名單包括一直被網民針對嘅方方同子涓，不過呢次網民見到佢哋被淘汰反應又唔係一面倒，有網民表示要熱烈慶祝，但有部份網民表示評分準則有問題，認為Jer組分數唔應該低過失誤嘅Dee組，紛紛留言：「雖然想淘汰方方同子涓，但成組表現ok，咁嘅評分唔公平。」、「Day忘詞，照入20強，企佢隔離foul左兩個。Jer組起碼冇忘詞，俾人砌到最低分。」、「有冇人同我一樣，覺得Jer組個show其實好睇？」、等等。有網民指Day大失準應該被淘汰，但就有唔少網民力撐Day之前表現認真，觀眾緣又高，所以值得留低。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！