【全民造星3】決賽點評 折骨Ben贏冠軍唔算爆冷 全晚MVP係呢位！

《全民造星3》隨住決賽完成而曲終人散，唔少觀眾認為賽果出人意表，前段獲得3成幾觀眾投票嘅Cloud（雲浩影）竟然最終三甲不入。而三甲人選竟然同分，要靠觀眾投票分高下，結果由演出突破但不被睇好嘅Ben（趙祥誠）贏得冠軍﹐力壓另一大熱人馬陳葦璇，以及向來深受中女愛戴嘅AnsonBean。十強喺決賽到底表現成點？我地根據最終排名回顧一下︰

第10名－NY

NY嘅由三十強嘅最後團隊演出著裙上陣、二十強嘅《玻璃動物園》，到決賽嘅2個項目都係以視覺行先，舞步同壓台感唔錯，但係音準咬字依然係死穴，第二首Walk On Water更加慘不忍睹，敬陪末席都係理所當然。

第9名－Kimman

向來形象斯文嘅黃劍文，一路走來力求突破，決賽延續搖滾曲風唱出莫文蔚《愛》，第二個表演又拍住B組隊友方方邊跳邊唱，表現唔錯但未算搶眼，落力但仍然搣唔甩「民謠歌手」味道，而且評判分數方面只係得倒數第二，最終以第9名完成賽事。

第8名 － CY

「神經刀」爆冷入十強，CY歌聲上嘅潛質優厚，決賽揀陳奕迅《讓我留在你身邊》同Mr.《如果我是陳奕迅》亦好啱佢嘅聲底，整體表現穩陣過關，不過同評判之一嘅ViuTV高層金廣誠 chit chat之際寸咗對方一吓，可能因此影響評判分數。值得一提係，CY喺觀眾投票排第5，扳回唔少分數，幾出人意表。

第7名 － Alina

越來越識得喺表演運用女性嫵媚做賣點嘅Alina，第一個項目《你敢我就敢》造型同舞蹈無得輸，連吳若希都話「身邊幾個男人一齊哇咗3次」！可惜唱功配合唔到，而第2項目同Manson合演嘅《這麼遠 那麼近》唱得有啲混亂，如果演出細節做得更好的話成績應該不止於此。

第6名 － KLAU

好希望演出自己作品嘅KLAU，第一個項目將GD嘅《Good boy》加入自己嘅rap詞，加埋指定團體舞蹈表現出色，評判分數排第3。第二項目連同3位3屆《造星》參加者合唱《發現號》就有啲奇怪，無法將KLAU嘅優點展現，加上觀眾投票拉低成績而五甲不入，似乎點樣令自己更有觀眾緣係KLAU需要考慮嘅一點。

第5名－Mischa

上一回合揀音樂劇歌曲盡顯Mischa多年聲樂訓練嘅功架，決賽以2首自己作品應戰，保持一貫水準但未能留下深刻印象。第二首歌《浸浴》嘅晚裝紗裙，同埋中間歌曲變奏之際企起身離開鋼琴嗰下，幾配合成個畫面。

第4名 － Cloud

觀眾投票第一嘅大熱「雲姨」三甲不入，跌晒眼鏡。第一首歌Love Never Felt So Good 如果有現場觀眾一齊拍和應該會對分數有幫助。向來跳舞唔係「雲姨」強項，呢part佢嘅得分排尾2。最後唱《彳亍》就因為高音失準而扣唔少分，結果喺評判得分方面排第7，變成梗頸四。

季軍 － AnsonBean

三甲雖然同分，但AnsonBean嘅評判得分係最高，畢竟現場睇佢嘅表演，又真係幾體會到嗰種感染力。兩個演出都展現到AnsonBean嘅舞台魅力，如果投票方面排高一級（最終排第4），分分鐘已經係實至名歸嘅冠軍。

亞軍 － 陳葦璇

陳葦璇第一回合揀咗多首Jennifer Lopez嘅歌曲，反而令人先入為主，比起「蘿霸」嘅力量同風韻點都爭些少。第二回合首次獨唱慢歌《願》，向高難度挑戰結果真係有幾個高音位去唔到。假如選曲上保險少少，「陳生」贏面唔細。

冠軍 － Ben

估唔到第一個項目會係唱歌，揀林宥嘉嘅《想自由》明顯係知道自己聲底似原唱；而第二個項目再將折骨舞配合故事玩得出神入化，不過都係上一輪入十強嘅《恐怖片》精采啲。Ben贏在揀咗難度合適嘅演出，同埋觀眾緣……咪即係藝人其中兩項跑出嘅條件囉。

全晚MVP - 司儀強尼

《全民造星3》由最後一round團體演出賽之後，聲勢高峰過晒，決賽各人嘅表演只可以話係合格收貨，對比起前幾round嘅BL故事《我們》、團體合唱《還不夠遠》甚至以喜劇演繹《好人》嘅演出，水準爭得幾多下。尋晚最好睇嘅係第三次獨挑大樑嘅司儀強尼，勁在多次執生成功，當CY同金廣誠嘅對話搭唔上咀，強尼就叫CY介紹下個參賽者解圍；因為技術問題下個項目未能進行，強尼立即同評判Stephy傾兩句拖延時間。成晚強尼嘅表現絕對拍得住「金牌司儀」水準。