【工展會2018】工展會開鑼　5個掃平貨攻略！

一年一度工展會又嚟啦！由香港中華廠商聯合會主辦的「第53屆工展會」將於明日開始至明年1月7日，於銅鑼灣維多利亞公園舉行。工展會點買先係最抵？準備去掃平貨嘅你，要留意以下攻略啦！

1. 買電子票／用八達通通道

一心想要掃限量平貨，但就要排隊買入場券？就會浪費唔少時間，係工展會網站一早就有得買門票，支援VISA信用卡、Mastercard、支付寶及微信支付。會場亦有八達通通道，唔想排隊買門票，就記得要先增值。

2. 用Alipay HK買滿300元可減20元

電子錢包是大勢所趨，係工展會都唔例外。今次係工展會會場購物乾貨時用Alipay HK付款，買滿300元可減20元。而購買熟食時買滿100元即可減20元。

3.「着數換購站」

今年大會與參展商合作特設「着數換購站」，只要買滿300元，就可以在「着數換購站」，以優惠價388元換購有不同的產品的福袋，包括家電、旅行及個人用品等。

4. 網上優惠

大會早前與HKTVmall聯乘的網上預購優惠將會在今日（14日）結束。但不少參展商都有在自己網站提供優惠，如南北行價值38元的湯包，會於明日（15日）早上11:00在網站內開售，限量80份。詳細可留意南北行網站。

5. 緊貼折扣情報

仲想要知道有咩抵買？其實優惠着數折扣產品一早放咗係工展會網站，唔洗周圍搵。就算搶唔到開幕優惠，都可以留意每周的購物優惠，當中都有不少特惠產品，要掃平貨就要做足功課啦。