女神法國訂婚！倪晨曦答應嫁圈外男友

藝人倪晨曦（Elva）一直都係宅男心目中嘅女神，更加係港女化妝扮靚嘅美容指標，網上人氣高企，不過！！女神剛剛就宣布佢要結婚喇！

今日佢喺社交網宣布自己原來一早已經訂婚，今年十月時佢仲喺法國出席緊巴黎時裝周，有日下午當佢做完嘢準備走人時，髮型師就同佢講話自己唔見銀包，Elva聽到就即刻趕點拍攝現場，點知就見到圈外男友V先生喺橋上現身：「他說了好多好多但我都不記得了，只是一個勁的哭，因為我好感動！！沒有想過他會選擇在我覺得最浪漫的城市向我求婚！」

喺佢上載嘅片中見到，一身西裝造型嘅男友當時即場下跪求婚，更遞上大大紮紅玫瑰及戒指，身旁亦準備好腳架同相機紀錄呢個難忘一刻，而主角Elva盲喊到收唔到聲，場面浪漫又感人，當然最後Elva就首肯答應嫁人啦，真係Sweet到爆～佢喺社交網上仲冧爆示愛：「上輩子一定是做了什麼好事，這輩子有這樣的疼愛。」2018年最後一日公布喜訊，唔知佢會喺2019年幾時搞婚禮呢？

倪晨曦接受東網訪問，佢話：「揀今日公布，係我寫緊今年一個總結，我寫吓寫吓睇緊今年發生嘅事同啲片，自己再睇番呢個片（求婚），再次感動到，發生咗一件咁開心嘅事，其實我工作做咗幾多嘢都好，其他方面幾大成就，原來呢件人生大事影響咗我好多，一個咁緊要嘅事喺2018發生，但我冇同大家講過，不如就揀今日話畀大家聽，我考慮咗一日之後就決定今日post。」

講到求婚片段中見到佢爆喊，佢笑言：「男朋友喺巴黎做呢件事，令我覺得好感動、震驚，完全冇諗過喺嗰個時間，因為嗰陣時做緊嘢，佢突然出現係好大驚喜，我完全控制唔到情緒。我自己就好開心，都希望身邊朋友同埋粉絲繼續支持我，婚禮計劃喺2019年，不過詳情仲未決定到，多謝大家關心。」