今日天氣急降，但一班女藝人無懼寒風，拋胸現身沙田馬場六福珠寶賽馬日，靚媽陳爽、何傲兒都擠出事業線谷胸現身，港姐雷莊兒中門大開顯現胸部線條。莊氏三姊妹莊思敏、莊思明、莊思華仲有梁嘉琪、顏子菲都有出席活動。

何傲兒今日身穿粉色系列谷胸裙，佢話：「因為條裙唔可以彎低身，胃腩位置係透視，一坐低會『一截截』，要挺直條腰。」

何傲兒早前因為食咗魷魚致腸胃炎，仲因為咁而瘦咗，仲話平時食鮑魚之類食物會胃部不適。今日件衫係家姐何傲芝親自幫佢揀：「估唔到今日突然咁凍，不過呢行女仔都有天生禦寒能力，最緊要靚。」自言慣咗唔怕凍嘅何傲兒話：「好多嘢可以訓練番嚟，例如自己十八歲著高踭鞋，兩、三個鐘就好攰，依家八至十個鐘都冇問題，所以體溫都係訓練番嚟，要凍親我都有啲難度。」香港唔凍就話啫！

雷莊兒今日為活動行騷，條裙胸前性感，清晰睇到胸部線條，佢話：「今日凍咗，但都冇乜選擇。 今日條裙好fit size， 冇特別貼膠紙，出場前會肯定安全 。」雷莊兒第一次到沙田馬場，但無意投注買馬，因為好驚輸，人生唔會賭錢。

更多娛聞，喺晒《娛果》
http://fb.com/appledailyent