九龍巴士8號線
| 九龍巴士8號線 | |
|---|---|
 | |
| 管理資訊 | |
| 經營者 | 九龍巴士 |
| 派車廠 | 荔枝角車廠 |
| 現時常用車 | 富豪B9TL |
| 用車數量 | 8 |
| 路線資訊 | |
| 起點站 | 尖沙咀碼頭 |
| 主要途經地點 | 紅磡、何文田、油麻地 |
| 終點站 | 九龍鐵路站 |
| 全程行駛里程 | 7.1英哩（11.4km） |
| 全程行車時間 | 63分鐘 |
| 服務資訊 | |
| 起點站 服務時間 | 05:30－00:30 |
| 終點站 服務時間 | 06:10－00:30 |
| 班次頻率 | 15－25分鐘一班 |
| 全程收費 | HK$5.1 |
| 分段收費站點 | 無 |
| 服務時間以外 替代路線 | 無 |
| 主要競爭交通 | 九龍區專線小巴8號線 （尖沙咀至何文田） |
九龍巴士8號線由尖沙咀碼頭出入九龍鐵路站，途經紅磡、何文田、油麻地。
2017年7月6號，九巴最後一班用非低地台巴士嘅班次喺呢條線開出，之後九巴成個車隊完成低地台化[1][2]。
歷史[編輯]
8號巴士係1974年8月16號開辦，當其時路線連接愛民邨同紅磡碼頭，惠及新落成愛民邨嘅居民。紅磡火車站喺1975年11月30號啟用後，巴士總站由紅磡碼頭搬遷至紅磡火車站。而為便利搭客駁船前往港島，1976年7月1號又試將尾站搬去尖沙咀碼頭。
1983年9月28號，何文田巴士線執位，8號同20號巴士（愛民—佐敦道碼頭）合併，總站由愛民邨搬去佐敦道碼頭，兼夾服務埋何文田邨同埋油麻地一帶。其後又喺1999年2月28號延長至九龍地鐵站，方便何文田一帶居民轉搭地下鐵東涌綫與及機場快綫。
順應21世紀潮流，8號線由2002年2月23號起改用全冷氣巴士服務。
行車路線[編輯]
- 去九龍鐵路站：梳士巴利道、漆咸道南、暢運道、安運道、暢運道、機利士南路、蕪湖街、馬頭圍道、佛光街、忠孝街、佛光街、常富街、何文田巴士總站、常富街、佛光街、培正道、窩打老道、彌敦道、佐敦道、連翔道、柯士甸道西、迴旋處、雅翔道、迴旋處、雅翔道同九龍站內通道。
- 去尖沙咀碼頭：九龍站內通道，雅翔道、柯士甸道西、廣東道、佐敦道、彌敦道、窩打老道、培正道、佛光街、常富街、何文田巴士總站、常富街、佛光街、忠孝街、佛光街、馬頭圍道、蕪湖街、大沽街、寶其利街、機利士南路、暢運道、漆咸道南同梳士巴利道。
車站一覽[編輯]
| 九龍鐵路站方向 | 尖沙咀碼頭方向 | ||||
|---|---|---|---|---|---|
| 車站 | 車站名 | 位置 | 車站 | 車站名 | 位置 |
| 1 | 尖沙咀碼頭 | 尖沙咀天星碼頭公共運輸交匯處 | 1 | 九龍站 | 九龍站公共運輸交匯處 |
| 2 | 尖東站 | 梳士巴利道 | 2 | 佐敦上海街 | 佐敦道 |
| 3 | 尖沙咀麼地道 | 漆咸道南 | 3 | 油麻地南京街 | 彌敦道 |
| 4 | 金德大廈 | 漆咸道南 | 4 | 油麻地文明里 | 彌敦道 |
| 5 | 香港理工大學 | 暢運道 | 5 | 青年會 | 窩打老道 |
| 6 | 紅磡站 | 安運道 | 6 | 廣華醫院 | 窩打老道 |
| 7 | 機利士南路 | 機利士南路 | 7 | 勝利道 | 窩打老道 |
| 8 | 孖庶街 | 蕪湖街[3] | 8 | 培正中學 | 培正道 |
| 9 | 家維邨 | 佛光街 | 9 | 何文田總站 | 常富街 |
| 10 | 信用街 | 佛光街 | 10 | 何文田廣場 | 常富街 |
| 11 | 忠孝街 | 忠孝街 | 11 | 迦密村街 | 忠孝街 |
| 12 | 迦密中學 | 忠孝街 | 12 | 孝民街 | 忠孝街 |
| 13 | 愛民邨 | 忠孝街 | 13 | 愛民總站 | 愛民巴士總站 |
| 14 | 忠民街 | 忠孝街 | 14 | 聖三一堂中學 | 忠孝街 |
| 15 | 欣圖軒 | 忠孝街 | 15 | 忠孝街 | 忠孝街 |
| 16 | 何文田廣場 | 常富街 | 16 | 信用街 | 佛光街 |
| 17 | 何文田總站 | 常富街[4] | 17 | 紅磡民裕街 | 馬頭圍道 |
| 18 | 香港公開大學 | 佛光街 | 18 | 寶其利街 | 寶其利街 |
| 19 | 培正中學 | 培正道 | 19 | 機利士南路 | 機利士南路 |
| 20 | 何文田街 | 窩打老道 | 20 | 紅磡鐵路站 | 紅磡車站公共運輸交匯處 |
| 21 | 廣華醫院 | 窩打老道 | 21 | 香港歷史博物館 | 暢運道 |
| 22 | 油麻地消防局 | 窩打老道 | 22 | 香港科學館 | 漆咸道南 |
| 23 | 加士居道 | 彌敦道 | 23 | 尖沙咀麼地道 | 漆咸道南 |
| 24 | 佐敦吳松街 | 佐敦道 | 24 | 尖東站 | 梳士巴利道 |
| 25 | 佐敦炮台街 | 佐敦道 | 25 | 尖沙咀碼頭 | 尖沙咀天星碼頭公共運輸交匯處 |
| 26 | 柯士甸道西 | 柯士甸道西 | |||
| 27 | 九龍站 | 九龍站公共運輸交匯處 | |||
用車演變[編輯]
受到舊何文田邨內嘅窄路，同埋紅磡站平台、由安運道左轉暢運道落紅磡方向天橋嘅窄彎影響，8號線曾經長時間短身嘅雙層巴士行。
喺1980、1990年代，8號線主要用丹尼士喝采同埋利蘭勝利二型前置引擎巴士，呢兩款巴士喺1990年代中後期大量退役之後，8號線就改用10米以下嘅後置引擎巴士。
舊何文田邨啲樓喺2001年拆嗮之後，九巴喺2002年上半年陸續將行經常富街嘅巴士線改成全冷氣巴士服務，8號線用過唔同嘅短身三軸冷氣巴士行駛，包括丹尼士巨龍9.9米、丹尼士三叉戟10.6米同埋富豪超級奧林比安10.6米，其中後兩者係低地台巴士。2003年6月，新何文田巴士總站啟用同埋佢出面嘅常富街擴闊，8號線用車都冇變。
2010年代沙中綫工程展開，連接紅磡同埋紅磡站平台嘅暢運道天橋受到影響，原本近住紅磡站平台嘅一段俾佢西面新起嘅一段橋面取代。新橋面喺2015年初啟用之後，呢個影響8號線派車嘅限制都冇埋，自此8號線除咗12.8米巴士之外，乜類型雙層巴士都有行。
2017年7月6號，九巴安排僅餘嘅兩架非低地台巴士（都係丹尼士巨龍9.9米冷氣巴士）嘅其中一架，喺嗰晚8點行8號線，由尖沙咀碼頭去九龍鐵路站，作為最後一班非低地台巴士嘅班次，之後九巴所有巴士線都用嗮低地台巴士嚟行[5][1][2]。
流行文化[編輯]
亞洲電視曾經喺2002年拍過一套電視劇，叫《8號巴士站站情》，用九巴8號線做背景[6]。
昔日嘅九巴8號線[編輯]
第一代8號線喺1920年代開辦，原本由中巴營運，往來尖沙咀同九龍塘（經旺角），1933年6月11號地區專利生效後由九巴接辦，二次大戰期間試過停駛，1946年10月閞返，1967年6月25號上晝因六七暴動再次停駛，之後都冇閞返。
參考[編輯]
- ↑ 1.0 1.1 九巴最後白板車尖沙咀開出 千人送別爆混亂，東方日報，2017年7月7號
- ↑ 2.0 2.1 500人送別「白板」九巴 互聯網檔案館嘅歸檔，歸檔日期2017年9月11號，.，蘋果日報（香港），2017年7月7號
- ↑ 特別班次起點站
- ↑ 特別班次終點站
- ↑ 【告別「白板車」】九巴第一代冷氣巴退役 尾班車周四晚尖沙嘴開，香港01，2017年7月5號
- ↑ 〈8號巴士站站情－亞洲電視〉. 原著喺2008年7月12號歸檔. 喺2018年12月21號搵到.
出面網頁[編輯]
